Ministria e Industrisë, Ndërmarrësisë dhe Tregtisë ka publikuar çmimoren e re të karburanteve e cila do të jetë valide për 24 orë.
Përmes një njoftimi në faqen zyrtare në Facebook bëhet e ditur se çmimi maksimal i naftës është 1.60 euro, ndërsa për benzinë është 1.34 euro.
Kurse çmimi maksimal i lejuar i produktit të gasit është 0.75 euro.
Kroacia është shteti i parë evropian që ka marrë masa konkrete për të ndihmuar popullin pas rritjes së madhe të çmimeve të derivateve.
Kryeministri kroat, Plenkoviq ka vendos sot uljen e përkohshme të akcizës për naftë e benzinë.
“Qeveria është duke rregulluar marzhën e tregtarëve të naftës dhe duke ulur përkohësisht akcizën për naftën dhe benzinën për të zbutur rritjen e çmimeve” ka thënë Plenkoviq.
Në Kroaci, nga nesër çmimi i naftës do të jetë 12,53 kuna apo 1.65 euro për litër, ndërsa çmimi i benzinit do të jetë 12.19 kuna, që i bie 1.62 euro për litër.
Plenkoviq e ka arsyetuar këtë vendim duke thënë se nëse do të zgjaste kjo rritje e çmimeve, rrezikohej seriozisht mbyllja e shumë pikave të karburanteve.
“Ne duam të kontribuojmë në uljen e goditjes së çmimeve për qytetarët tanë dhe sipas llogaritjeve tona, kjo do të çojë në zvogëlimin e të hyrave të buxhetit të shtetit nga akciza për energjinë mbi 150 milionë kuna”, tha Plenkoviq
Shtrenjtimi i derivateve nuk do të ndalet në Kosovë. Çmimi i naftës dhe benzinës është duke u rritur për çdo ditë nga 8 deri në 10 centë.
Rritje do të këtë edhe gjatë natës së sontme.
Kryetari i Shoqatës së Naftëtarëve të Kosovës, Fadil Berjani në një deklarim për IndeksOnline ka treguar se rritja e çmimi të derivateve do të ndodh edhe sonte. .
“Aktualisht çmimi i derivateve është dikund rreth 1.50, deri në 1.51 centë. Mirëpo, trendi i rritjes është duke vazhduar ende, dhe pritet që rritja te shkoj deri në 8 apo 10 cent. Nga kjo del se deri sonte në mesnatë çmimi për një litër naftë arrin në 1.50 centë, ose në 1.60 centë”.
Ai ka pranuar se këto çmime janë shumë të shtrenjta për qytetarët e Kosovës, por sipas tij, çmimet nuk varen nga ta por nga Berza ndërkombëtare.
“ Këto çmime janë shumë të larta. Por, ta keni parasysh se kjo po ndodh në të gjithë botë. Ne nuk jemi duke i rritur çmimet, ato po rriten si shkak i luftës në Ukrainë.”