Drejtori i Departamentit për Relacion me Publikun në Telekomin e Kosovës, Menduh Abazi ka dhënë dorëheqje sot nga kjo pozitë. Këtë e ka konfirmuar vet ai,teksa tha se ka dhënë dorëheqje për shkaqe shëndetësore.
Më tutje Abazi ka deklarurar se pas pushimit do të rikthehet në Telekom, por në një pozitë tjetër.
“Të premten e kam një operim. Për një kohë do të jem në pushim. Por kur të kthehem unë do të vazhdojë punën në Telekom. Do të jem pjesë e Telekomit, jo nivelit ekzekutiv, për arsye personale-shëndetësore kam dhënë sot dorëheqje. Për pozitën e re do të vendoset konform shkollimit tim”, ka thënë ai për Express.
Në ndërkohë dje, pas zhvillimeve të fundit në Telekom, ka dhënë dorëheqje edhe ushtruesi i detyrës së drejtorit Teknik në këtë ndërmarrje Halil Krasniqi.
Ai në Telekom ka punuar inxhinierë që nga paslufta.
Xhevdet Smakiqi është shkarkuar sot nga pozita e kryeshefit të Postës së Kosovës.
Shkarkimin e ka konfirmuar vet ai, duke thënë se vendimi në fjalë ka prapavi politike dhe i njëjti do të ketë edhe kosto ekonomike, shkruan lajmi.net.
E lajmi.net ka mësuar se në vend të Smakiqit, në pozitën e kryeshefit pritet të zgjidhet Rafet Jashari.
Ky i fundit, në të kaluarën ishte ushtrues detyre i pozitës së kryeshefit të Postës.
Smakiqi ishte emëruar kryeshef i Postës së Kosovës në muajin mars të këtij viti.
Lajmi.net kishte raportuar për një raport të Inspektoratit, ku thuhej se Smakiqi, sa ishte drejtor në këtë ndërmarrje, e kishte dëmtuar atë me mijëra euro me një veprim të kundërligjshëm.
Teksa Kosova po përballet me gjendje të rëndë ekonomike të krijuar nga pandemia COVID-19, disa zyrtarë kanë vendosur të rehatojnë vetën. Më 3 dhjetor 2020, në mbledhjen e Bordit të Përkohshëm të Drejtorëve të Postës së Kosovës është vendosur të rritet paga për 30% për zyrtarët të saj të lartë. Si duket zyrtarët e lartë nuk e kanë hallin e punëtorëve të tyre që nuk kanë marrë ende pagat e muajit të kaluar e kjo për shkak të gjendjes aspak të mirë financiare të kësaj ndërmarrjeje.
Ndonëse Bordi i kaluar i Postës për shkak të gjendjes së keqe financiare i kishte zbritur pagën zyrtarëve të lartë të kësaj ndërmarrje publike, lajmi.net merr vesh se bordi i ri ka marr vendim t’i rehatojë zyrtarët e lartë paga të majme. Se nga kush ka ardh ky propozim nuk thuhet në dokument.
Në dokumentin e siguruar nga lajmi.net Kryeshefit të Postës (19 nëntor), Xhevdet Smakiqi, do të marr pagë hiç më pak se 2 mijë e 500 euro. Paga enorme kanë edhe zyrtarë të tjerë: Zëvendës i Kryeshefit Ekzekutiv, 2100 euro, zyrtar kryesor i Financave dhe Thesarit 2100 euro, këshilltar i Përgjithshëm/Sekretar i Korporatës 2100 euro, zyrtar i Auditimit të Brendshëm 2100 euro.
Smakiqi ka vendosur të mos jetë i kujdesshëm sikurse ish-U.D. i Kryeshefit Ekzekutiv, Salih Morina, i cili kishte vendosur për uljen e pagave 30 % për zyrtarët e lartë të kësaj ndërmarrje publike, për shkak të gjendjes së rëndë financiare të saj.
Vendimi i rritjes së pagave të zyrtarëve të lartë të Postës thotë:
Bordi i Përkohshëm i Drejtorëve të NPQ-së Posta e Kosovës SH.A., në përputhje me Ligjin mbi NP Nr.03/L-087 dhe ndryshimeve dhe plotësimit të Ligjit mbi NP Nr.04/L-111, në takimin e rregullt nr.17, i mbajtur më datë 03/12/2020, merr këtë vendim:
Miratohet, kthimi i përkohshëm i koeficientit të mëparshëm për grada 17 dhe 16, me koeficent/Paga bruto, sipas tabelës më poshtë.
Kryeshefit Ekzekutiv, 2500 euro
Zëvendës i Kryeshefit Ekzekutiv, 2100 euro
Zyrtar kryesor i Financave dhe Thesarit 2100 euro
Këshilltar i Përgjithshëm/Sekretar i Korporatës 2100 euro
Zyrtar i Auditimit të Brendshëm 2100 euro
Vendimi hyn në fuqi më datë: 03/12/2020
Si arsyetim, Bordi i Përkohshëm i Drejtorëve të Postës së Kosovës thotë se ka qenë diferenca e pagave mes gradës 17 dhe 16 me gradat 15 e më poshtë e duke mos përmendur askund nëse ka probleme financiare apo janë rregulluar ato.
“Deri të miratimi i këtij vendimi për kthimin e përkohshëm të koeficientit të mëparshëm për gradat 17 dhe 16, ka ardhur si rezultat i diferencës së pagesës disbalansuese në mes të gradave të mëposhtme, përkatësisht në mes të gradës 17 dhe 16 me grada 15 e më poshtë. Ky vendim është i përkohshëm, përkatësisht deri sa të bëhet rikustruktimi i përgjithshëm i koeficienteve pagave për të gjithë punëtorët e Postës së Kosovës Sh.A”, thuhet në vendimin e nënshkruar nga kryesues i Bordit të Përkohshëm Leonard Shabanaj .
Kujtojmë, se në Mbledhjen e Bordit të Përkohshëm të Drejtorëve të Postës së Kosovës, e mbajtur më 26 maj 2020, me propozimin e U.D. Kryeshefit Ekzekutiv, Salih Morina, ishte vendosur për uljen e pagave 30 % për zyrtarët e lartë të kësaj ndërmarrje publike, për shkak të gjendjes së rëndë financiare të saj.“Vullnetarisht ishte deklaruar U.D. Kryeshefi Ekzekutiv, Salih Morina për zbritjen e pagës së tij, nga paga që kishte: 2,500 euro, tani me zbritje do ta ketë 1,750 euro”, njoftoi Posta e Kosovës.
Po ashtu për 3 pozitat e zyrtarëve të lartë: Sekretari i Postës, Zyrtari Kryesor Financiar dhe Thesarit, si dhe Zyrtari i Auditimit të Brendshëm, u vendos që pagat nga 2,100 euro, tani me zbritje t’i marrin 1,450 euro.
Lajmi.net ka dërguar pyetje në aderesë të Qeverisë nëse është në dijeni lidhur me rastin, mirëpo deri në momentin e publikimit të këtij artikulli nuk ka marr përgjigje. /F.Toplana/Lajmi.net/
