Category: BOTA

Presidenti i SHBA-së, Donald Trump, thotë se Irani ka 48 orë kohë për të “bërë një marrëveshje” ose për të hapur Ngushticën e Hormuzit përpara se “Ferri të mbretërojë mbi ta”.

Në një postim në Truth Social, ai shkruan: “A ju kujtohet kur i dhashë Iranit dhjetë ditë kohë për të BËRË NJË MARRËVESHJE ose për ta HAPUR NGUSHTICËN E HORMUZIT. Koha po mbaron”, shkruan BBC, raporton KlanKosova.tv.

“48 orë para se i gjithë Ferri të mbretërojë mbi ta. Lavdi Zotit! Presidentit DONALD J. TRUMP.”

Më 27 mars, Trump njoftoi se po ndalonte çdo sulm ndaj centraleve të energjisë iraniane për 10 ditë nga ajo kohë.

Në një postim tjetër pak më parë, duke folur kryesisht për përfitimet që tarifat i kanë sjellë ekonomisë amerikane, ai e mbylli me: “E gjithë kjo dhe, njëkohësisht, heqja qafe e një Irani Bërthamor. MAGA!!!”

Autoritetet turke njoftuan sot se provinca lindore e Van, është goditur nga një tërmet me magnitudë 5,2 ballë Rihter.

Nuk pati raportime të menjëhershme për viktima ose dëme, tha agjencia AFAD në një deklaratë, duke shtuar se vlerësimet në terren janë duke vazhduar.

Tërmeti goditi rrethinën Tuşba në orën 08:52 të mëngjesit në një thellësi prej 7 kilometrash, me lëkundje të ndjera edhe në provincat përreth”, shtoi autoriteti.

Një anije e dytë me flamur turk ka kaluar Ngushticën e Hormuzit, rrugën tregtare të mbyllur nga lufta, tha të shtunën Ministri i Transportit i Turqisë, Abdulkadir Uraloglu.

Irani ka mbyllur Ngushticën e Hormuzit, një rrugë kryesore detare globale, që nga fillimi i sulmeve të SHBA-së dhe Izraelit mbi Iran më 28 shkurt, të cilat nxitën konfliktin në Lindjen e Mesme dhe rritën ndjeshëm çmimet globale të naftës dhe gazit.

Uraloglu tha se më 28 shkurt, 15 anije të pronarëve turq prisnin të kalonin përmes ngushticës strategjike.

“Dy nga këto 15 kanë kaluar. Kjo shpjegohet nga iniciativat tona dhe gjithashtu nga fakti se ato po përdornin porte iraniane ose po transportonin mallra që vinin nga ose shkonin për Iran”, tha Uraloglu.

Uraloglu nuk tha se kur kaloi anija e dytë, ndërsa anija e parë kishte kaluar me lejen e Iranit, më 13 mars.

Ministri tha se vetëm nëntë nga anijet e bllokuara kishin kërkuar leje për të kaluar ngushticën dhe se ministritë e transportit dhe të jashtme po përpiqeshin t’i ndihmonin.

“Katër prej tyre nuk kanë kërkuar të largohen. Dy janë anije për prodhimin e energjisë dhe ndodhen në vend. Dy të tjerat po presin që situata të qetësohet,” shtoi ai.

Një ngjarje e rëndë është regjistruar mbrëmjen e djeshme në Via Piave, në Bolonjë, ku një djalë 12-vjeçar me origjinë shqiptare ka vdekur pasi ka rënë nga dritarja e çatisë së një ndërtese.

Ngjarja ka ndodhur rreth orës 19:00, ndërsa sipas raportimeve paraprake, xhami mbi të cilin po ecte i mituri nuk ka mundur të përballojë peshën e tij dhe është thyer, duke bërë që ai të bjerë dhe të përplaset në shkallë.

Përpjekjet e shokëve që ndodheshin me të për ta ndihmuar kanë qenë të pasuksesshme, pasi 12-vjeçari ka ndërruar jetë në vendin e ngjarjes.

Menjëherë pas incidentit, në vendngjarje kanë mbërritur ekipet e urgjencës mjekësore dhe forcat e policisë, të cilat kanë nisur hetimet për zbardhjen e plotë të rrethanave.

Hetimet mjeko-ligjore janë përqendruar në oborrin e ndërtesës, i cili përfshin disa shkallë, si dhe në zonën ku ndodhi rënia tragjike e të miturit

Moti i keq “Erminio” ka goditur Greqinë gjatë 48 orëve të fundit, duke shkaktuar përmbytje në rreth 25 shtëpi dhe dëme të konsiderueshme, veçanërisht në ishullin Poros.

Ura kryesore pranë Panagitsa u shemb nga presioni i ujit. Zëvendësministri i Krizave Klimatike, Konstantinos Katsafados, viziton sot zonat e prekura për të vlerësuar situatën.

Këshilli i Sigurimit të OKB do të votojë një rezolutë të propozuar nga Bahreini për mbrojtjen e rrugës së përdorur në ngushticën e Hormuzit nga anijet transportuese.

Sipas Reuters, lajmi është bërë i ditur sot (e premte), megjithatë Kina me të drejtë vetoje, e bëri të qartë se kundërshtona fuqishëm autorizimin të përdorimit të forces në atë pjesë, transmeton Klankosova.tv.

Takimi i Këshillit të Sigurisë dhe votimi i rezolutën pritet të zhvillohet mëngjesin e së shtunës, dhe jo të premten siç ishte planifikuar fillimisht.

Bahreini, kryesuesi aktual i Këshillit të Sigurisë, finalizoi draft rezolutën e cila do të autorizojë “të gjitha mjetet e nevojshme mbrojtëse’’ në kalimin detar.

Presidenti i Shteteve të Bashkuara, Donald Trump, paralajmëroi se ushtria amerikane “ende nuk ka filluar” të shkatërrojë Iranin, duke kërcënuar se do të godasë ura dhe centrale elektrike në vend.

Deklarata erdhi pas sulmeve iraniane me raketa dhe dronë ndaj Izraelit dhe shteteve të Gjirit.

Trump e përshëndeti gjithashtu shkatërrimin e urës më të madhe në Iran, ndërsa zyrtarët iranianë raportuan viktima dhe dëme të mëdha, duke premtuar kundërpërgjigje më të ashpra.

Presidenti Volodymyr Zelensky tha se situata në vijën e frontit për Ukrainën ishte më e mira në 10 muaj, duke shtuar se trupat e Kievit kishin penguar një ofensivë ruse muajin e kaluar.

“Ofensiva që ata po planifikonin për në mars u pengua nga veprimet e forcave tona të armatosura. Kjo është arsyeja pse rusët tani thjesht do të shtojnë operacionet e tyre të sulmit”, tha Zelensky, në komentet e publikuara nga zyra e tij të premten, shkruan Reuters, transmeton Klankosova.tv.

Udhëheqësi ukrainas tha se i ftoi negociatorët amerikanë të vizitonin Kievin gjatë një takimi online në fillim të kësaj jave dhe se kishte dëgjuar “sinjale pozitive” në përgjigje të propozimit të tij.

“Në përgjithësi, vija e frontit po mbahet… Situata është komplekse, por më e mira që ka qenë në 10 muajt e fundit”, tha ai, duke cituar të dhëna nga inteligjenca ukrainase dhe britanike.