Një laborator i madh i drogës u zbulua sot në një fshat të Pejës bashkë me kapjen e një sasie të substancave narkotike.
Për këtë Prokuroria e Pejës dhe njësiti antidrogë nisën një aksion. Përveç tyre, në vend të ngjarjes shkoi edhe ekipi i KEDS meqë laboratori ishte i kyçur ilegalisht në rrjetin elektrik.
Ministri i Punëve të Brendshme, Xhelal Sveçla, ka bërë të ditur se gjatë ditës së sotme janë gjetur armë, pajisje ushtarake dhe granata dore në veri të vendit.
Përmes një postimi në Facebook, ai njoftoi se ato janë zbuluar në dy lokacione të ndryshme në Zubin Potok.
“Beteja kundër çdo celule terroriste nuk ndalet. Si dje, edhe sot. Sërish, në dy lokacione në komunën e Zubin Potokut u gjet armatim, granata dore dhe pajisje të tjera ushtarake. Nga kushtetutshmëria cep më cep, te kontrolli pëllëmbë për pëllëmbë. Nuk do të ndalemi deri në çrrënjosjen totale të secilit element kriminal”, ka shkruar Xhelal Sveçla.
Kliko linkun video:
https://www.facebook.com/share/r/1CULVM3feQ/?mibextid=wwXIfr
Një incident i rëndë ka ndodhur në një gjimnaz në Malishevë, ku një konflikt mes nxënësve ka eskaluar në dhunë fizike, duke lënë një të mitur të lënduar rëndë.
Ngjarja ka ndodhur gjatë orarit mësimor, ku sipas informacioneve, një nxënës është goditur me mjet të fortë në pjesën e kokës.
Si pasojë e goditjes, ai ka pësuar lëndime dhe është dërguar me urgjencë për trajtim mjekësor në spital.
Rrethanat e sakta të incidentit ende nuk janë sqaruar plotësisht, ndërsa rasti është duke u trajtuar nga organet kompetente, të cilat kanë nisur hetimet për të zbardhur motivet dhe përgjegjësinë.
Një aksident trafiku me lëndime është regjistruar në orët e vona të mbrëmjes në rrugën nacionale Pejë–Prishtinë.
Ngjarja ka ndodhur më 16 prill rreth orës 23:00 në Korroticë të Lartë.
Siç mëson Sinjali, në aksident janë përfshirë një kamion i tipit MAN me rimorkio dhe një veturë VW Touran.
Si pasojë e përplasjes, i lënduar ka mbetur drejtuesi i veturës, Sh.Z (51 vjeç), i cili është dërguar me autoambulancë për trajtim në QKUK.
Njësia e hetimeve ka dalë në vendin e ngjarjes dhe po merret me zbardhjen e rrethanave të aksidentit.
Gjykata Themelore në Prishtinë ka vendosur t’ua zgjasë edhe për dy muaj paraburgimin prindërve të 5-vjeçarit në Lipjan, të dyshuar për keqtrajtim.
Vendimi është konfirmuar nga zëdhënësja e gjykatës, ndërsa fëmija është liruar nga spitali në gjendje stabile.
Rasti ka shkaktuar reagime të shumta në opinion për shkak të dyshimeve për trajtim të papërshtatshëm nga prindërit.
Një rast i rëndë ka ndodhur më 17 mars 2026 në Gadime të Lipjanit.
Një fëmijë i moshës pesë vjeçare ishte dërguar në Emergjencën Qendrore të Qendrës Klinike Universitare të Kosovës (QKUK) me plagë të rënda në të dy shputat e këmbëve dhe ndryshime gangrenoze.
Sipas njoftimit të Klinikës së Pediatrisë, fëmija në momentin e pranimit ishte në gjendje të rënduar, me dyshime për kequshqyerje dhe vështirësi në komunikim. Menjëherë pas pranimit thuhet se janë realizuar konsultat nga kirurgu plastik dhe pediatri, të cilët kanë rekomanduar hospitalizimin urgjent në Repartin e Kujdesit Intensiv Pediatrik për trajtim të mëtejshëm.
Ai më pas i ishte nënshtruar një operacioni, ndërsa dje pas përmirësimit të gjendjes së tij shëndetësore është liruar dhe është marrë në trajtim nga QPS në Gjakovë.
Gjykata Themelore në Prishtinë, i kishte caktuar masën e paraburgimit prindërve të tij që dyshohen ta kenë keqtrajtuar më 18 mars 2026.
Kjo Gjykatë i ka vazhduar masën e paraburgimit prindërve të tij me inicialet A.K dhe V.P edhe për dy muaj, nën dyshimet për kryerjen e veprave penale “shkelja e detyrimeve familjare” dhe “lëndim i rëndë trupor”.
“Referuar kërkesës tuaj për informata, ju njoftojmë se pas kërkesës së Prokurorisë Themelore në Prishtinë për vazhdimin e masës së paraburgimit në çështjen penale ndaj të pandehurve A.K. dhe V.P., të dyshuar për veprat penale Shkelja e detyrimeve familjare dhe Lëndim i lëndë trupor, gjyqtarja e procedurës paraprake pas shqyrtimit të kërkesës, përmes Aktvendimit të datës 15.04.2026 ka aprovuar kërkesën e Prokuroisë, ashtu që të njëjtëve iu është vazhduar masa e paraburgimit në kohëzgjatje prej 2 (dy) muaj për secilin, e cila masë do të llogaritet deri me datë 14.06.2026″, ka thënë zëdhënësja e Gjykatës Themelore në Prishtinë, Mirlinda Gashi.
Në lidhje me këtë rast, janë nisur dyshime për dështim të kryerjes së detyrës së tyre nga institucionet, saktësisht QPS në Lipjan. Në momentin kur ka ndodhur rasti, ministri për Familje Andin Hoti ka urdhëruar Inspektoratin që të kryej kontroll të dokumenteve dhe gjithçka tjetër në QPS në Lipjan, për të parë nëse të njëjtit kanë kryer detyrën e tyre.
E këtë raport, Hoti e ka pranuar sot, i cili ka thënë se QPS ka dështuar të kryej detyrën e tyre.
“Raportin çuditërisht e kam pranuar sot. Njëra prej të gjeturave të raportit thotë që në vendimin e Gjykatës të vitit 2023 i ka obliguar Qendrën për Punë Sociale për monitorimin e familjes në raport me fëmijët. Pra, e ka obliguar Qendrën për Punë Sociale në raport edhe me prindërit për shëndetin mendor të tyre, që QPS-të nuk merren me shëndetin mendor, janë Qendrat për Shëndetin Mendor që merren me shëndetin mendor, jo QPS-të. Sidoqoftë, është nën hetim prej Prokurorisë. Çka mund të ndërmarrim tjetër ne është një propozim ndaj kryetarit të komunës së Lipjanit që me i qit në masa disiplinore të gjithë stafin e Qendrës për Punë Sociale që është në Lipjan dhe këtë do ta bëjmë nesër, sepse sot është jashtë afatit të punës dhe të shqyrtohen nëse ata vërtetë i kanë ndjekur masat”, ka thënë Hoti.
E në lidhje me këtë, Prokuroria Themelore në Prishtinë ka intervistuar zyrtarët e QPS-së pas raportit.
“Lidhur me pyetjen tuaj, ju njoftojmë se Prokurori i Shtetit ka lëshuar autorizim Policisë, me qëllim të mbledhjes dhe grumbullimit së provave dhe intervisitimin e palëve, të përfshirë në këtë rast.
Aktualisht, ende nuk është pranuar raporti nga Policia. Për çdo zhvillim të mëtejmë lidhur me këtë çështje, do të njoftoheni me kohë”, kanë thënë nga Prokuroria Themelore në Prishtinë.
Një aksident trafiku ka ndodhur të mërkurën në fshatin Bërshanc të Suharekës, ku janë përfshirë një veturë dhe një çiklist i mitur.
Si pasojë e aksidentit, lëndime të rënda ka pësuar një fëmijë nëntëvjeçar, i cili është dërguar me urgjencë për trajtim në Qendrën Klinike Universitare të Kosovës (QKUK).
Gjendja e tij shëndetësore raportohet të jetë e rëndë, ndërsa aktualisht ndodhet në Mjekimin Intensiv.
Lidhur me rastin, drejtori i Emergjencës, Naser Syla, ka dhënë detaje për gjendjen e të miturit.
“Fëmija i lindur në vitin 2017 është në gjendje të rëndë, me politraumë. Pas ekzaminimeve të kryera në Qendrën Emergjente, ai është dërguar në sallën operative nga ekipet kujdestare të Neurokirurgjisë dhe Anestezionit. Pas ndërhyrjes kirurgjikale, është transferuar në Mjekësinë Intensive për trajtim të mëtejmë”, ka deklaruar Syla.
Autoritetet pritet të japin informacione shtesë lidhur me rrethanat e aksidentit.
Policia e Kosovës ka arrestuar personin që dy ditë më herët ishte arratisur nga stacioni policor -jugu, në Prishtinë derisa po intervistohej.
Sipas policisë, rasti kishte ndodhur, më 13 prill 2026 rreth orës 16:10, ndërsa më 15 prill 2026 i dyshuari, mashkull kosovar, është lokalizuar dhe arrestuar nga njësitë policore.
Rasti po hetohet për veprat penale: arratisje e personit të privuar nga liria, dëmtim i pasurisë së huaj dhe sulm ndaj personit zyrtar. Me vendim të prokurorit, i dyshuari është dërguar në mbajtje për 48 orë.
Një 48-vjeçar ka humbur jetën tragjikisht në vendin e tij të punës në qytetin e Shtimes, mbrëmjen e së martës.
Rastin e ka konfirmuar zëdhënësi i Policisë së Kosovës për rajonin e Ferizajt, Kanun Veseli, i cili bëri të ditur se ngjarja ka ndodhur rreth orës 20:45 në një kompani që operon në zonën industriale të Shtimes.
Sipas tij, viktima, një punëtor rreth moshës 48-vjeçare, ka pësuar lëndime gjatë procesit të punës dhe është dërguar menjëherë në Emergjencën e Ferizajt. Megjithatë, pavarësisht përpjekjeve të stafit mjekësor, aty është konstatuar vdekja e tij.
“Ju njoftojmë se më 15.04.2026, rreth orës 20:45, kemi pranuar një informatë se në një kompani në zonën industriale në Shtime, një person (punëtor) rreth 48 vjeç është lënduar gjatë punës. Ai është dërguar menjëherë në Emergjencën e Ferizajt, ku nga ekipi mjekësor është konstatuar vdekja e tij”, ka deklaruar Veseli.
Në vendin e ngjarjes kanë dalë menjëherë njësitet relevante policore, përfshirë patrullat dhe hetuesit e stacionit policor në Ferizaj.
Po ashtu, janë njoftuar edhe hetuesit dhe krimteknikët nga Sektori Rajonal i Hetimeve, prokurori i shtetit, si dhe Inspektorati i Punës, të cilët kanë nisur ndërmarrjen e veprimeve të nevojshme hetimore për zbardhjen e plotë të rrethanave të këtij rasti.
Për shkak të rritjes së numrit të punëtorëve që humbin jetën në vendin e punës, ministri i Punës, Familjes dhe Vlerave të Luftës së UÇK-së, Andin Hoti, ditë më parë paralajmëroi aksion të jashtëzakonshëm të inspektimeve në sektorin me rrezik të lartë, veçanërisht në ndërtimtari.
Hoti ka marrë vendim për fillimin e menjëhershëm të një aksioni të jashtëzakonshëm kombëtar të inspektimeve.
Ai ka thënë se çdo kompani që nuk garanton kushte bazike të sigurisë, do të ketë ndalim të menjëhershëm të punimeve, do ndëshkohet sipas ligjit dhe nuk do të lejohet të vazhdojë punën derisa të plotësojë standardet.
Vetëm gjatë periudhës nga janari deri në muajin prill të këtij viti, janë regjistruar tetë raste fatale që lidhen drejtpërdrejt me vendin e punës.
Një person ka mbetur i lënduar nga vetaksidenti që ndodhi mëngjesin e sotëm në dalje të Prizrenit, në autostradën “Ibrahim Rugova”, ku një cisternë me karburant është përmbysur.
Kështu e ka konfirmuar për Sinjalin, zëdhënësi i Policisë së Kosovës, Bajram Krasniqi.
“Rreth orës 06:00, në kilometrin 24 të autostradës, drejtimi Prishtinë-Prizren, ka ndodhur një aksident trafiku. Në aksident është përfshirë një kamion (vetaksident). Si pasojë e aksidentit një person ka kërkuar ndihmë mjekësore. Policia e ka trajtuar aksidentin”, ka thënë Krasniqi.