rilindja.albeniplast.com

Category: LAJME

  • Nesër seancë e jashtëzakonshme e Kuvendit

    Kuvendi i Kosovës nesër do të mbajë seancë të jashtëzakonshme plenare. Pikë e vetme e rendit të ditës është çmimi dhe faturimi i energjisë elektrike për konsumatorët.

    Seanca do të nis nga ora 11:00.

    Gjatë ditës, kryeparlamentarja Albulena Haxhiu, njoftoi se Kuvendi i Kosovës do të mbajë tri seanca këtë javë.

    Haxhiu këtë e bëri të ditur pas mbledhjes së Kryesisë.

    Haxhiu tha se seanca e parë mbahet të enjten me fillim të orës 10:00, ndërkaq dy të tjera të premten, njëra ndër to solemne për Eliot Engel, kongresistin i cili vdiq më 10 prill.

    Megjithatë tashmë seanca e parë do të jetë ajo e jashtëzakonshmja, nesër.

  • Nxënësi bllokohet në derën e autobusit, tërhiqet zvarrë gjatë lëvizjes (VIDEO)

    Një nxënës është bllokuar në derën e autobusit, teksa është tërhequr zvarrë gjatë lëvizjes.

    Ngjarja ka ndodhur në Melbourne të Australisë, derisa kjo është kapur nga kamerat e sigurisë, raporton BBC. 

    Djali 12-vjeçar u zvarrit rreth 350 metra poshtë një rruge periferike në Wheelers Hill, pasi dyert e pasme i bllokuan krahun dhe çantën e shkollës.

    Bëhet e ditur se ai nuk është lënduar, ndërkaq nëna e tij mblodhi pamjet dhe i ndau në mediat sociale duke akuzuar kompaninë e autobusëve për neglizhencë.

    Një zëdhënës i kompanisë tha se shoferi i autobusit u shkarkua nga puna.

    “Ky është një incident shumë shqetësues dhe ne do të vazhdojmë të mbështesim pasagjerin dhe familjen në këtë kohë”, tha ai.

    Pamjet i gjeni brenda linkut:

    Momenti kur nxënësi u bllokua në derën e autobusit.

  • Një i vdekur, të tjerë të lënduar – pasi një autobus u përplas me një supermarket në Salzburg të Austrisë

    Një i vdekur, të tjerë të lënduar – pasi një autobus u përplas me një supermarket në Salzburg të Austrisë

    Një aksident i rëndë trafiku ka ndodhur të hënën në mëngjes në Salzburg të Austrisë.

    Sipas mediave të huaja, përcjell Telegrafi, bëhet fjalë për një aksident kur një autobus i transportit publik u përplas në hyrje të një supermarketi në lagjen Itzling.

    Sipas mediave, dyshohet se shoferi pësoi një urgjencë mjekësore, duke humbur kontrollin e mjetit.

    – YouTube  www.youtube.com

    Si pasojë e përplasjes, një person ka humbur jetën në mënyrë tragjike.

    Ndërkohë, raportohet se shoferi është dërguar në spital dhe i është nënshtruar një operacioni urgjent.

    Veç këtyre, raportohet se ka edhe të tjerë të lënduar, me disa rëndë dhe të tjerë më lehtë.

    Në vendngjarje kanë ndërhyrë ekipet e shpëtimit, policia dhe zjarrfikësit, të cilët po trajtojnë të lënduarit dhe menaxhojnë situatën.

    Dëme të mëdha materiale janë shkaktuar në fasadën e ndërtesës, ndërsa zona është rrethuar dhe trafiku është bllokuar.

    Operatori Salzburg Linien ka shprehur ngushëllimet për viktimën dhe ka bërë të ditur se shkaqet e aksidentit janë ende nën hetim.

  • Aktgjykimi për rastin “Banjska” shpallet më 24 prill

    Gjykata Themelore në Prishtinë ka përmbyllur shqyrtimin gjyqësor për rastin e sulmit në Banjskë të Zveçanit, duke lënë shpalljen e aktgjykimit më 24 prill në ora 15:00.

    Në seancën përfundimtare, palët kanë paraqitur qëndrimet e tyre rreth akuzave ndaj të dyshuarve, ndërsa prokuroria ka insistuar se provat dëshmojnë përfshirjen në sulmin e 24 shtatorit 2023.

    Rasti “Banjska” konsiderohet një nga proceset më të ndjeshme gjyqësore në vend, për shkak të natyrës së rëndë të akuzave që lidhen me sulmin ndaj Policisë së Kosovës.

  • Ekstradohet nga Gjermania i kërkuari për grabitje, sillet në Kosovë

    Ekstradohet nga Gjermania i kërkuari për grabitje, sillet në Kosovë

    Një shtetas kosovar i kërkuar me letër-rreshtim ndërkombëtar është ekstraduar nga Gjermania në Kosovë, ka njoftuar Policia e Kosovës.

    Sipas autoriteteve, ai ishte arrestuar nga policia gjermane pasi kërkohej nga institucionet e drejtësisë së Kosovës për veprën penale “grabitje”, ndërsa ishte shmangur nga drejtësia për një periudhë kohore.

    Ekstradimi është realizuar në bashkëpunim mes autoriteteve kosovare dhe gjermane, përmes INTERPOL-it dhe mekanizmave të bashkëpunimit ndërkombëtar policor.

  • “Kurti po kërkon pushtet absolut, për egon autoritare të tij”, Kabashi i ashpër me kryeministrin

    Anëtari i Kryesisë së LDK-së, Festim Kabashi, e ka akuzuar kryeministrin Albin Kurti, se po kërkon pushtet absolut, ndërsa vendin po e dërgon në zgjedhje të reja.

    Sipas tij, qëllimet e Kurtit për t’i kapur të gjitha pushtetet nuk mund të kalojnë me LDK-në, duke iu referuar refuzimit të partisë së tij, ndaj ofertave të Kurtit për çështjen e presidentit.

    “Krejt pushtetin ne Qeveri.  Krejt pushtetin ne Kuvend. Krejt pushtetin edhe ne Presidence?

    Kurti po kerkon pushtet absolut, per me e kenaq egon autoritare te tij. Pra po shkojme ne zgjedhje per shkak te tij.

    Kjo kapje nuk kalon. Jo me LDK-ne!”. 

    Ndryshe, sot kryetari i kësaj partie, Lumir Abdixhiku, tha se nuk do të takohet më me Kurtin pas dështimit të bisedimeve.

    “U përpoqa, provova, nuk arrita, fatkeqësisht. Tani do t’i kthehem LDK-së dhe do t’i kthehem misionit të madh të bashkimit të së djathtës brenda LDK-së”, ka thënë Abdixhiku.

    Sipas tij, Kurti ka insistuar që pozita e presidentit t’i mbetej partisë së tij.

  • Tregjet evropiane bien pas sulmit të fundit në Ngushticën e Hormuzit

    Tregjet evropiane të aksioneve u hapën me rënie, ndërsa optimizmi po zbehet se rruga ujore kryesore e Ngushticës së Hormuzit mund të hapet shpejt.

    Lajmi se SHBA-të kishin ndaluar dhe sekuestruar një anije mallrash me flamur iranian, së bashku me deklaratën e Iranit të shtunën se po e mbyllte përsëri ngushticën, kanë rrëzuar shpresat për një zgjidhje të shpejtë të situatës.

    Çmimi i naftës së papërpunuar Brent u rrit me 5% në 95.29 dollarë për fuçi, ndërsa tregtarët reaguan ndaj lajmeve të fundit nga Gjiri, duke përmbysur disa nga rëniet e vërejtura të premten kur Irani kishte thënë se Ngushtica e Hormuzit do të ishte “plotësisht e hapur” për anijet tregtare për pjesën e mbetur të armëpushimit, shkruan BBC.

    Indeksi i aksioneve FTSE 100 i Mbretërisë së Bashkuar ra me 0.6%, DAX i Gjermanisë ra me 1.6% dhe indeksi Cac 40 i Francës ra me 1.3% të hënën në mëngjes.

    “Shpresat për një rifillim të afërt të tregtisë, veçanërisht të dërgesave të energjisë, janë zhdukur”, thotë Susannah Streeter, stratege kryesore e investimeve në Wealth Club.

  • Kuvendi vendos për tri seanca – njëra i kushtohet Eliot Engel

    Kuvendi i Kosovës do të mbajë tri seanca këtë javë.

    Këtë e ka bërë të ditur kryetarja e Parlamentit, Albulena Haxhiu pas mbledhjes së Kryesisë.

    Ajo tha se seanca e parë mbahet të enjten me fillim të orës 10:00, ndërkaq dy të tjera të premten, njëra ndër to solemne për Eliot Engel, kongresistin i cili vdiq më 10 prill.

    “Kemi vendosur që t’i mbajmë tri seanca të Kuvendit, secila prej tyre është me rëndësishme se tjetra, kemi obligime para qytetarëve. Me këtë rast e para mbahet më 23 prill nga ora 10:00, tjerat mbahen të premten, një dedikuar për Eliot Engel si seancë solemne, tjetra me pika të rendit të ditës, Bordin e RTK-së dhe KPM-së dhe të tjera si këto”, tha Haxhiu

  • Kosova rrezikon seriozisht të humbë 68.8 milionë euro të BE-së në qershor

    Kosova pritet të humbë përgjithmonë shumën prej 68,8 milionë euro nga Plani i Rritjes për Ballkanin Perëndimor nëse deri në fund të qershorit të këtij viti nuk i përmbush hapat në reforma të cilat kanë pasur afat deri në mesin e vitit 2025 me një periudhë gri deri më 30 qershor të këtij viti. KOHA mëson nga burimet në Bruksel se edhe vendet tjera do të humbasin shuma të konsiderueshme nëse deri në këtë afat nuk i përmbushin obligimet të cilat ishin caktuar me Agjendën e reformave që është kusht për shfrytëzimin e këtyre mjeteve.

    Një burim i BE-së tha se Komisionerja për zgjerim Marta Kos u ka dërguar në fund të javës së shkuar një letër të gjitha gjashtë vendeve të rajonit të Ballkanit Perëndimor të cilat janë përfituese të mjeteve nga Plani i Rritjes, ku ajo ua tërheq vërejtjen se do të humbin këto mjete nëse deri në afatin e caktuar nuk i përmbushin kushtet.

    “Komisionerja u ka tërhequr vërejtjen partnerëve për nevojën që të përshpejtojnë reformat në mënyrë që të përfitojnë nga fondet e parapara nga ky Plan. Rikujtojmë se afati gri për hapat të cilat është dashur të përmbushen në mesin e vitit 2025 skadon më 30 qershor të këtij viti. Ndërsa për hapat të cilat është dashur të përmbushen deri në fund të vitit 2024 përfundon nga fundi i vitit 2026. Nëse afatet nuk respektohen, partnerët rrezikojnë që të humbin mbi 700 milionë euro së bashku”, ka thënë një burim i Komisionit Evropian.

    Kosova sapo kishte nisur javën e shkuar të marrë pagesat e para nga parafinancimi nga Plani i rritjes për Ballkanin Perëndimor. Këto mjetet e para Kosovës nisën t’i paguhen pas shumë vonesave të shkaktuara nga ngërçi politik në vitin 2025, kur nuk kishte mundësi për ratifikim të marrëveshjeve për kredi dhe mjete mes Kosovës dhe BE-së.

    Sipas një përllogaritjeje, Kosova në qershor do të humbë 68,8 milionë euro. Më së shumti mjete do të humbë Bosnja e Hercegovina, e cila nuk ka përfituar akoma asnjë cent nga ky plan. Ajo do t’i humbë edhe 373,9 milionë euro.

    Këto mjete të përmendura do të humben në qershor, ndërsa deri në fund të vitit humbjet do të mund të jenë edhe më të mëdha nëse nuk përmbushen detyrimet. Sipas një tabele për monitorimin e përmbushjes së kushteve nga Plani i rritjes, Kosova nuk e ka përmbushur asnjë nga 11 hapa të paraparë. Pra 0 nga 11 hapa. Prandaj rreziku që Kosova të humbë mjete të mëdha është i madh nëse nuk veprohet shpejt.

  • “Vajton” terro**sti i Banjskës: S’i kam duart me gjak, dua t’i kthehem familjes!

    Avokati Millosh Delleviq, mbrojtës i të pandehurit Vladimir Toliq në rastin e Banjskës, ka deklaruar se klienti i tij është fajtor, por jo për veprën e terrorizmit, siç e cilëson prokuroria.

    Sipas Delleviqit, gjykata duhet të refuzojë kualifikimin e veprës si terrorizëm, pasi, sipas tij, “nuk ka elemente që e mbështesin këtë cilësim”. Ai theksoi se Toliq nuk është i pafajshëm, por përgjegjësia e tij nuk lidhet me terrorizmin, shkruan Indeksonline.

    “Vladimir Toliq është pa dyshim fajtor, por gjatë shqyrtimit të dënimit besojmë se ekzistojnë rrethana lehtësuese”, u shpreh avokati.

    Ai përmendi si faktorë lehtësues gjendjen familjare të të pandehurit, duke theksuar se Toliq është prind dhe se fëmijët e tij po rriten pa të. Po ashtu, sipas tij, klienti ka kaluar dy operacione dhe ka probleme shëndetësore.

    Delleviq shtoi se pret që dënimi eventual të jetë rreth 10 vjet burgim.

    Nga ana tjetër, vetë Toliq është deklaruar i pafajshëm për akuzat për terrorizëm, duke insistuar se “duart e tij nuk janë me gjak”. Ai ka shprehur dëshirën që t’i kthehet familjes dhe fëmijëve të tij.