rilindja.albeniplast.com

Category: LAJME

  • Publikohen pamjet historike: Momenti kur astronautët bien në Oqean pas kthimit nga Hëna

    Publikohen pamjet historike: Momenti kur astronautët bien në Oqean pas kthimit nga Hëna

    Pas kalimit me shpejtësi të madhe nëpër atmosferën e Tokës, kapsula Orion ka aterrur në mënyrë të sigurt në Oqeanin Paqësor, pranë brigjeve të San Diegos.

    NASA kishte parashikuar që kapsula të arrinte shpejtësi deri në 23,839 milje në orë (38,365 km/h) gjatë rikthimit në atmosferën e Tokës.

    Kapsula hapi pothuajse një duzinë parashutash për të ndihmuar zbritjen, duke ngadalësuar në mënyrë të sigurt anijen hapësinore prej 21,000 paundësh nga shpejtësi shumë të larta në rreth 20 milje në orë në momentin e uljes në ujë, raporton skynews.

    VIDEO – Momenti kur zbresin në Oqeanin Paqësor 

    Kjo shënon përfundimin e një misioni rekord 10-ditor në anën e largët të Hënës për Reid Wiseman, Victor Glover, Christina Koch dhe Jeremy Hansen.

     

    Ata kanë udhëtuar 252,756 milje larg Tokës në misionin Artemis II – më larg se kushdo tjetër në histori.

  • Plagosi të dashurën dhe më pas veten, Policia jep detaje për incidentin e rëndë në Ferizaj

    Plagosi të dashurën dhe më pas veten, Policia jep detaje për incidentin e rëndë në Ferizaj

    Policia e Kosovës në raportin 24 orësh ka dhënë detaje rreth ngjarjes së  rëndë ka ndodhur në Ferizaj, ku një mashkull kosovar dyshohet se ka shtënë me armë zjarri drejt të dashurës së tij dhe më pas ka qëlluar veten.

    Sipas Policisë, të dyshuarit dhe viktima janë dërguar për trajtim mjekësor në Qendrën Klinike Universitare të Kosovës (QKUK) në Prishtinë.

    Në vendin e ngjarjes, autoritetet e policisë gjetën dhe sekuestruan një armë zjarri, një karikator me gjashtë fishekë dhe tri gëzhoja.

    Rasti është duke u hetuar.

    “VRASJE NË TENTATIVË. Ferizaj 10.04.2026, 21:58. Është raportuar se i dyshuari mashkull kosovar, ka shtënë me armë zjarri drejt të dashurës së tij dhe më pas e qëllon veten. Të lënduarit janë dërguar për tretman mjekësor në QKUK, Prishtinë. Në vendin e ngjarjes janë gjetur dhe sekuestruar një armë zjarri me një  karikator gjashtë fishekë dhe tri gëzhojat e armës së përdorur. Rasti nën hetime”, njofton PK.

  • ZRRE-ja propozon që të mos ketë shtrenjtim të energjisë elektrike

    ZRRE-ja propozon që të mos ketë shtrenjtim të energjisë elektrike

    Zyra e Rregullatorit të Energjisë ka propozuar që për sivjet të mos ketë shtrenjtim të energjisë elektrike.

    Në një komunikatë për media, ZRRE-ja ka njoftuar për publikimin e raporteve konsultative për të hyrat e lejuara maksimale për Operatorin e Sistemit të Transmetimit dhe Tregut (KOSTT), Operatorin e Sistemit të Shpërndarjes (KEDS), dhe Furnizuesin e Shërbimit Universal (KESCO).

    Në këtë njoftim është thënë se ZRRE-ja ka propozuar që të shmanget ndikimi i menjëhershëm dhe që kjo të shpërndahet në më shumë se një periudhë tarifore, nëpërmjet një mekanizmi të profilizimit të kostove.

    “Ky mekanizëm parasheh që një pjesë e kostove të rritura të furnizimit të shpërndahet në më shumë se një periudhë tarifore, me qëllim zbutjen e ndikimit në tarifa për një vit të vetëm. Ky trajtim nuk përfaqëson ulje reale të kostove, por një shpërndarje të tyre në kohë, duke kontribuar në stabilitetin e furnizimit dhe përballueshmërinë për konsumatorët. Pra ZRRE propozon që për këtë vit relevant tarifor të mos ketë rritje të tarifave të energjisë elektrike për konsumatorët e shërbimit universal”, thuhet në komunikatë.

  • Skandal në showbizin turk: Arrestohen 14 personazhe të njohura

    Skandal në showbizin turk: Arrestohen 14 personazhe të njohura

    Aktori i njohur Burak Deniz është ndaluar mëngjesin e sotëm si pjesë e një operacioni të gjerë që ka në shënjestër 14 individë, përfshirë figura të njohura publike, në kuadër të hetimeve për çështje droge.

    Mes personave të arrestuar raportohen reperi Norm Ender, shefi i kuzhinës Somer Sivrioğlu, muzikanti Mert Demir dhe aktorët Büşra Pekin e Burak Deniz. Operacioni vazhdon dhe autoritetet nuk kanë dhënë ende detaje të plota për të gjithë personat e përfshirë.

    Me urdhër të Kryeprokurorisë Publike të Anadollit, një grup prej 14 individësh është urdhëruar të shoqërohet, përfshirë Hafsanur Sancaktutan, Emir Can İğrek, Somer Sivrioğlu, Serra Pirinç, Ogün Alibaş, Utku Ünsal, Sinem Özenç Ünsal, Elif Büşra Pekin, Ahsen Eroğlu, Burak Deniz, Mert Demir, Emre (FEL) Öztürk, Ender Eroğlu dhe Enes Güler.

    Në një deklaratë zyrtare, Kryeprokuroria njoftoi se operacioni, pjesë e dosjes hetimore 2026/73811, u koordinua me Drejtorinë e Krimeve Narkotike të Xhandarmërisë Provinciale të Stambollit dhe ka për qëllim ndjekjen penale për përdorim të drogës për qëllime personale.

    Kontrollet dhe sekuestrimet e kryera më 9 prill 2026 synuan kapjen e personave të dyshuar për blerje, posedim dhe përdorim të lëndëve narkotike. Deri tani, 11 persona janë arrestuar, dy janë shpallur në kërkim, ndërsa një tjetër ndodhet jashtë shtetit.

    Prokuroria bëri me dije se hetimet kundër krimeve që rrezikojnë shëndetin publik do të vazhdojnë me vendosmëri të plotë, duke theksuar rëndësinë e ndëshkimit të veprimeve të paligjshme të të famshmëve.

  • Kosova shënon fitore ndaj Austrisë, siguron kualifikimin në fazën tjetër

    Kosova shënon fitore ndaj Austrisë, siguron kualifikimin në fazën tjetër

    Kombëtarja e Kosovës në futsall ka vazhduar me paraqitje të shkëlqyeshme në parakualifikimet për Botërorin 2028, duke regjistruar fitoren e dytë radhazi në miniturneun kualifikues të Grupit D, që po zhvillohet në Igalo të Malit të Zi. Dardanët e futsallit triumfuan në një ndeshje spektakolare ndaj Austrisë, me rezultat 6:3.

    Ndeshja nisi me ritëm të lartë nga të dyja skuadrat, por ishte Kosova ajo që tregoi më shumë efikasitet në momentet vendimtare. Shefki Kameri zhbllokoi rezultatin në minutën e 11-të, ndërsa më pas skena i takoi Ramadan Alajt, i cili realizoi katër gola (19’, 23’, 32’ dhe 37’), duke qenë figura kryesore e takimit.

    Në listën e golashënuesve për Kosovën u regjistrua edhe Shqiprim Imeri, i cili realizoi në minutën e 28-të.

    Nga ana tjetër, për Austrinë realizuan Gustavo (16’, 36’) dhe Alex Flögel në minutën e 22-të, por kjo nuk mjaftoi për të ndalur ritmin e lartë të Dardanëve drejt kualifikimit tutje.

    Me këtë triumf, Kosova e ka siguruar tashmë kalimin në fazën kryesore të kualifikimeve (Main Round), pasi dy skuadrat e para nga grupi avancojnë tutje.

    Ndeshjen e fundit dhe njëherësh vendimtare për vendin e parë në grup Dardanët do ta zhvillojnë kundër Malit të Zi, të dielën në orën 19:30.

  • Turqia merr vendim që këto modele të veturash t’i zhdukë nga tregu

    Turqia merr vendim që këto modele të veturash t’i zhdukë nga tregu

    Prodhimi i sedanëve të segmentit C, të cilët shiten me çmime të përballueshme në Turqi, po i vjen fundi gradualisht. Ndërsa prodhimi i Fiat Egea Sedan-it do të përfundojë në qershor 2026, prodhimi i Renault Megane-t, i cili është shitur me të njëjtën karroceri për shumë vjet, do të përfundojë gjithashtu në vitin 2027.

    Rënia e disponueshmërisë së automjeteve sedan me çmime të përballueshme në treg ka filluar t’i zhvendosë blerësit e makinave drejt modeleve SUV.

    Rritja e fushatave promocionale për makinat e reja i ka vështirësuar shitjet në tregun e makinave të përdorura, duke çuar në ulje çmimesh deri në 15 për qind.

    Lufta midis SHBA-së dhe Iranit, i cili ka hyrë në një armëpushim të brishtë, dhe rënia e çmimeve të arit nga nivelet e tyre më të larta historike kanë shtyrë planet për blerjen e makinave. Për më tepër, normat e interesit të depozitave që arrijnë në 42% në vit kanë ulur gjithashtu shitjet e makinave.

  • Arben Mustafa pyet qeverinë: A do të ulen çmimet me ligjin për “çmimet tavan”?

    Arben Mustafa pyet qeverinë: A do të ulen çmimet me ligjin për “çmimet tavan”?

    Arben Mustafa, deputet i PDK-së, ka thënë se Qeveria është arsyetuar se inflacioni në vend po ndodh shkaku i mungesës së Ligjit për çmimet tavan.

    Në seancën e jashtëzakonshme të Kuvendit, ai kërkoi nga qeveria t’i tregojë qytetarëve se a do të ulen çmimet kur të kalojë ky ligj.

    “Është shumë kohë e shkurtër për të diskutuar për këtë ligj shumë të rëndësishëm që ndikon në treg. Prej që ka fiolluar rritja e çmimeve në Kosovë, ju si qeveri jeni arsyetuar se në ungesë të ligjit për çmimet tavan po ndodh kjo.

    Tani kur e keni sjell në Kuvend këtë ligj, është mirë t’i tregoni qytetarëve se a do të ulen çmimet a jo. Arsyetimi juaj ka qenë se ka inflacion në Kosovë sepse s’ka ligj për çmimet tavan”, u shpreh Mustafa.
  • Pas BBVK, Klodi flet hapur për raportin me Londrimin dhe Elijonën

    Pas BBVK, Klodi flet hapur për raportin me Londrimin dhe Elijonën

    Ish-finalisti i “Big Brother VIP Kosova”, Klodian Mihaj, ka zhvilluar një bashkëbisedim me ndjekësit e tij përmes pyetjeve dhe përgjigjeve.

    Ai foli edhe për raportin që ka me ish-banorët e tjerë të shtëpisë, konkretisht me Londrimin dhe Elijonën.

    “A jeni hala shokë me Londrimin dhe Elijonën?”, ishte pyetja që iu drejtua Klodit.

    Klodi konfirmoi se marrëdhënia mes tyre vazhdon ende, duke lënë të kuptohet se lidhja e krijuar gjatë eksperiencës në “Big Brother VIP Kosova” nuk ka qenë thjesht për lojë, por ka kaluar edhe jashtë shtëpisë.

  • Suedia tronditet nga një rast, burri e detyroi gruan e tij të prostituohej nga 120 burra

    Suedia tronditet nga një rast, burri e detyroi gruan e tij të prostituohej nga 120 burra

    Një burrë i dyshuar për shfrytëzimin e gruas së tij duke e detyruar atë të ofrojë shërbime seksuale kundrejt një pagese u paraqit në gjykatë në Suedi të premten me akuzat për prostitucion të rënduar dhe përdhunim, në një çështje që përfshin rreth 120 burra të tjerë.

    I dyshuari 62-vjeçar, i cili i mohon akuzat, u arrestua dhe u ndalua në tetor pasi gruaja e tij e denoncoi atë në polici në Suedinë Veriore.

    Burri, një ish-anëtar i klubit të motoçikletave Hells Angels, u duk i qetë ndërsa prokurorja Ida Annerstedt lexoi akuzat.

    Viktima e tij nuk ishte e pranishme në sallën e gjyqit për të mbrojtur anonimatin e saj dhe ndoqi seancën dëgjimore nëpërmjet video-lidhjeje. Pas leximit të aktakuzës, gjyqi vazhdoi me dyer të mbyllura.

    Sipas aktakuzës, i pandehuri e ka shfrytëzuar gruan e tij për vite me radhë duke e detyruar të kryejë akte seksuale.

    “Ai akuzohet për prostitucion të rënduar. Ai organizoi një operacion në të cilin partnerja e tij, e cila më vonë u bë gruaja e tij, u mor me prostitucion”, tha Annerstedt.

    Burri akuzohet për krijimin e reklamave online, organizimin e takimeve, kryerjen e mbikëqyrjes dhe detyrimin e gruas së tij për të kryer akte seksuale me anë të një transmetimi në internet me qëllim tërheqjen e më shumë klientëve.

    Prokurori tha se viktima ishte “nën ndikimin e drogës dhe alkoolit dhe kishte shumë frikë prej tij”, duke kujtuar se i pandehuri është gjithashtu në gjyq për kërcënime dhe sulm.

    Përveç prostitucionit të rënduar, burri u akuzua për tetë përdhunime, një prej të cilave përfshinte gruan dhe klientin e tij.

    Shtatë akuzat e mbetura lidhen me akte seksuale që gruaja u detyrua të kryente para kamerave, gjë që është e barabartë me përdhunim sipas ligjit suedez.

    120 persona dyshohen se kanë paguar për shërbime seksuale. 26 prej tyre janë akuzuar tashmë.

  • Rritja e çmimeve nuk ndalet, marsi sjell valë të re shtrenjtimi në treg

    Rritja e çmimeve nuk ndalet, marsi sjell valë të re shtrenjtimi në treg

    Sipas të dhënave të Agjencisë së Statistikave të Kosovës, Indeksi i Harmonizuar i Çmimeve të Konsumit (IHÇK) shënoi rritje gjatë muajit mars 2026, duke reflektuar një trend të vazhdueshëm të shtrenjtimit të jetesës.

    Inflacioni mujor në mars 2026 arriti në 1.5% krahasuar me muajin shkurt 2026. Kjo rritje u ndikua kryesisht nga shtrenjtimi i karburanteve dhe lubrifikantëve për pajisjet e transportit personal (25.8%), si dhe rritja e çmimeve të perimeve (3.7%), pemëve (1.5%) dhe mishit (0.3%). Këto kategori patën ndikim të përbashkët prej 1.7% në rritjen e indeksit. Në të njëjtën kohë, një lehtësim i lehtë u vërejt te energjia elektrike (-3.7%) dhe lëndët djegëse të ngurta (-2.2%), duke ndikuar negativisht me rreth -0.2% në IHÇK.

    Në aspektin vjetor, inflacioni në mars 2026 arriti në 6.7%, krahasuar me marsin e vitit 2025. Rritjet më të mëdha të çmimeve u regjistruan te shërbimet që lidhen me transportin personal (42.5%), biletat e fluturimeve (38.4%) dhe furnizimi me ujë së bashku me shërbimet e banimit (31.9%). Po ashtu, ndikim të konsiderueshëm patën edhe rritja e çmimeve të energjisë elektrike (17.4%), karburanteve (17.4%), lëndëve djegëse (15.6%) dhe pushimeve të organizuara (13.2%).

    Produktet ushqimore gjithashtu kontribuan në rritjen e përgjithshme të çmimeve, përfshirë pemët (13.1%), mishin (12.4%), si dhe produkte të tjera si kafeja, çaji dhe kakao (7.8%). Rritje u shënuan edhe në shërbimet hoteliere, kujdesin personal, shërbimet shëndetësore dhe mallrat për mirëmbajtjen e ekonomisë shtëpiake.

    Në përgjithësi, të dhënat tregojnë se inflacioni në Kosovë gjatë marsit 2026 është nxitur nga rritja e çmimeve në shumë sektorë kyç, duke reflektuar presione të vazhdueshme në koston e jetesës për qytetarët.