Category: AKTUALE

Njësia Evropiane për mbushjen e pijeve të kompanisë Coca-Cola ka njoftuar një tërheqje masive të produkteve Coke, Sprite dhe disa pijeve të tjera, pas zbulimit të niveleve të larta të kloratit që mund të paraqesin rreziqe shëndetësore për konsumatorët.

Sipas The Economic Times, tërheqja, e shpallur të hënën nga Coca-Cola Europacific Partners Belgium, përfshin kanaçet dhe shishet e qelqit që përmbanin nivele të larta të kësaj substance.

Produktet e prekura janë shpërndarë në Belgjikë, Holandë, Britani, Gjermani, Francë dhe Luksemburg që nga muaji nëntor.

Në Kosovë, Agjencia e Ushqimit dhe Veterinarisë (AUV) nuk ka marrë ende ndonjë njoftim zyrtar për dyshime lidhur me sigurinë e produkteve të Coca-Cola që tregtohen në vend.

“Agjencia e Ushqimit dhe Veterinarisë deri më tani nuk ka ndonjë lajmërim-notifikim për dyshime rreth sigurisë së produktit Coca-Cola që tregtohet në Kosovë. Jemi duke monitoruar situatën përmes mekanizmave të kontaktit me autoritete dhe organizata të sigurisë së ushqimit. Mbi çdo ndryshim do ta mbajmë konsumatorin të informuar. Deri më tani nuk ka asnjë dyshim”, deklaroi zëdhënësi i AUV-së, Lamir Thaçi.

Kosova merr njoftime për sigurinë ushqimore nga Sistemi për Paralajmërim të Shpejt për Ushqim (RASFF) i Bashkimit Evropian.

Autoriteti Evropian për Siguri të Ushqimit, në një opinion shkencor të publikuar më 2015, ka theksuar se ekspozimi afatgjatë ndaj kloratit përbën një shqetësim të mundshëm shëndetësor, veçanërisht për fëmijët me mungesë të vogël apo të mesme të jodit.

Një nga nyjet më të mëdha të trafikut në Beograd, Autokomanda, është bllokuar për orë të tëra, ndërsa studentët dhe qytetarët kanë bërë të ditur se kjo bllokadë do të zgjasë 24 orë.

Kjo do të thotë se ata do të qëndrojnë në rrugë deri në orën 10 të nesërme, shkruajnë mediat e huaja.

Studentëve të cilët prej dy muajsh po protestojnë për mungesë transparence në rastin e rindërtimit të mbulesës së stacionit hekurudhor në Novi Sad, e cila u shemb dhe vrau 15 persona, u janë bashkuar edhe qytetarë të shumtë.

Bllokada u shënua sonte dhe një moment veçanërisht interesant ishte kur mijëra të pranishmit ndezën “dritat” në telefonat e tyre për të treguar se sa ishin.

Studentët kanë shkuar aty në disa grupe dhe nga disa drejtime, ndërsa me studentët që kanë bllokuar Fakultetin e Bujqësisë në Zemun ka pasur edhe fermerë me traktorë.

Studentët po kërkojnë publikimin e të gjithë dokumentacionit për rinovimin e ndërtesës së Stacionit Hekurudhor në Novi Sad, ku tenda ra nëntorin e kaluar, duke vrarë 15 persona.

Ndonëse autoritetet në Serbi më herët pretendonin se i gjithë dokumentacioni për rindërtimin e stacionit ishte publikuar, kryeministri serb Millosh Vuçeviq të shtunën njoftoi se sot do të publikohen dokumente të reja në ueb faqen e Qeverisë së Serbisë.

Të shtunën, presidenti Aleksandar Vuçiq kërkoi nga qeveria, investitorët, kontraktorët dhe prokuroria që të publikojnë të gjitha dokumentet që kanë të bëjnë me Stacionin Hekurudhor në Novi Sad, për të cilin Fakulteti i Inxhinierisë së Ndërtimit në një deklaratë deklaroi se mungon.

Ministria e Mbrojtjes ka reaguar pas raportimeve që rekrutëtve të saj të rinj nuk u janë siguruar çizme.

Ata kanë thënë që në tetor të vitit të kaluar i kanë liferuar pesë mijë e 730 palë çizme të iclat i kanë shpërndarë sipas planit të tyre dhe nevojave të pjesëtarëve, dhe se ende ka çizme në stok.

“Në muajin tetor të vitit 2024, janë liferuar 5730 palë çizme nga Ministria e Mbrojtjes.  Pra, 5730 palë çizme janë pranuar në depo dhe të njejtat janë shpërndarë sipas planit të shpërndarjes së FSK-së dhe nevojave të pjesëtarëve”, thuhet në reagimin e ministrisë së Mbrojtjes.

“Duke marë parasysh numrin total të ushtarakëve kjo sasi ka qenë e mjaftueshme për të githë pjesëtarët e FSK-së, madje çizme vazhdon të ketë edhe në stok. Kësisoj asnjë ushtar nuk ngelet pa çizme për mungesë sasie përveçse për ndonjë arsye tjerër të cilat nuk janë në domenin e Ministrisë së Mbrojtjes”.

“E mirëpresim kritikën mediale kur bëhet mbi bazën e provave dhe informacioneve që duhet kërkuar nga vet insitucioni për të zbardhur arsyet e rastit, por jo kur të njëjtat bëhen vetëm duke u nisur nga një fotografi që nuk pasqyron realitetin”.

“Forca e Sigurisë së Kosovës do të njoftojë strukturat e Ministrisë së Mbrojtjes rreth rastit specifik”.

Procesi mësimor në shkollën fillore “Dardania” në Prishtinë është pezulluar për klasën 6/3, si pasojë e një situate shqetësuese që ka përfshirë sjellje të dhunshme nga një nxënës ndaj shokëve të klasës. Kjo gjendje ka shkaktuar reagim të fortë nga prindërit, të cilët kërkojnë ndërhyrje të menjëhershme për të siguruar një ambient të sigurt për fëmijët e tyre.

Një prind, fëmija i të cilit ka pësuar dëmtime fizike në disa raste brenda pak ditësh, ka raportuar çështjen te drejtuesit e shkollës. Megjithatë, ai është shprehur se përgjigjet e marra nuk kanë qenë të mjaftueshme për të adresuar problemin. “Fëmija im është dëmtuar tri herë brenda dhjetë ditëve, dhe pavarësisht raportimeve, nuk kemi parë asnjë veprim konkret. Ne nuk mund të lejojmë që kjo situatë të vazhdojë,” tha prindi, transmeton Telenews.al

Ndërsa drejtuesit e shkollës kanë konfirmuar se për nxënësin në fjalë është hartuar një raport, mbetet e paqartë nëse janë ndërmarrë hapa për të siguruar mbështetje specifike, si për shembull caktimi i një asistenti për menaxhimin e sjelljes. Prindërit theksojnë se mungesa e një zgjidhjeje të tillë ka krijuar një klimë pasigurie për nxënësit e klasës.

Telenews.al ka tentuar të marrë një përgjigjje zyrtare lidhur me bojkotin e nxënësve pas rasteve të dhunës në këtë shkollë, por deri në këto momente s’ka marrë përgjigjje.

Nga ana tjetër, prindi i nxënësit që ka shkaktuar shqetësime ka apeluar për ndihmë dhe zgjidhje të situatës përmes mediave. Ndërkohë, pezullimi i mësimit ka shkaktuar zemërim dhe pasiguri mes familjeve të nxënësve, të cilët kërkojnë masa të menjëhershme nga Drejtoria Komunale e Arsimit dhe Ministria e Arsimit.

“Ne kemi kërkuar zgjidhje në çdo instancë, por deri më tani nuk kemi parë asnjë veprim konkret. Nuk mund të lejojmë që fëmijët tanë të vuajnë për shkak të mungesës së reagimit nga institucionet,” tha një tjetër prind i shqetësuar.

Prindërit e klasës 6/3 theksojnë se zgjidhja e këtij problemi është jetike për rikthimin e qetësisë dhe normalitetit në mësim. Ata apelojnë për masa të menjëhershme, duke përfshirë ofrimin e asistencës së nevojshme dhe sigurimin e një mjedisi të përshtatshëm për të gjithë nxënësit. /Telenews.al/