Category: SPORT

Drejtuesit e Manchester Cityt nuk e përjashtojnë mundësinë për të bërë një lëvizje konkrete për mesfushorin e Nottingham Forest, Morgan Gibbs-White, në afatin kalimtar të ardhshëm.

Sipas raportimeve të Football Insider, 26-vjeçari është gjithashtu në radarët e Tottenham Hotspur, duke e bërë të mundur një garë të fortë mes dy klubeve të mëdha të Ligës Premier.

Edhe pse Nottingham Forest ndodhet vetëm tre pikë mbi zonën e rënies nga kategoria, Gibbs-White vazhdon të tërheqë vëmendjen falë paraqitjeve të tij të qëndrueshme.

Që nga transferimi i tij, ai ka regjistruar 153 ndeshje zyrtare me klubin, duke kontribuar me 25 gola dhe 32 asistime.

Performancat e tij i kanë siguruar gjithashtu gjashtë paraqitje me Kombëtaren e Anglisë.

Megjithatë, çdo klub i interesuar do të duhet të përgatitet për një investim të konsiderueshëm financiar.

Kontrata e mesfushorit me Nottingham Forest është e vlefshme deri në qershor të vitit 2028 dhe drejtuesit e klubit nuk pritet të ulin kërkesat e tyre financiare, madje as në rast të një rënieje nga elita.

Sipas gazetarit Pete O’Rourke, shuma e kërkuar për kartonin e tij mund të variojë nga 60 deri në 70 milionë euro, ndërsa në disa raportime përmendet edhe një vlerësim që shkon deri në 80 milionë euro, shkruan Telegrafi.

Interesimi i kahershëm i Manchester Cityt dhe rikthimi i mundshëm i Tottenhamit në garë tregojnë se e ardhmja e Gibbs-White mund të jetë një nga temat më të nxehta të afatit kalimtar së verës, me disa klube të Ligës Premier që pritet të monitorojnë nga afër situatën e tij.

Vinicius Junior ka folur për marrëdhënien e tij me Kylian Mbappe, duke hedhur poshtë çdo aludim për tension mes tyre pas transferimit të francezit te Real Madridi në verën e vitit 2024.

Braziliani pranoi se ardhja e Mbappes solli ndryshime në dinamikën e skuadrës, por nënvizoi se raporti mes tyre është i shkëlqyer, si në fushë ashtu edhe jashtë saj.

Në një intervistë të fundit, Vinicius zbuloi se ka qenë prej vitesh një nga zërat që ka shtyrë për transferimin e Mbappes në “Santiago Bernabeu”.

“Çdo verë i shkruaja: ‘Kur po vjen?’ Kam vepruar si agjent”, u shpreh ai me humor, duke treguar se dëshira për të luajtur përkrah më të mirëve ka qenë gjithmonë prioritet i tij.

Sipas sulmuesit brazilian, bashkëpunimi me lojtarë të nivelit të lartë rrit shanset për trofe dhe forcon ambiciet e klubit.

Vinicius theksoi gjithashtu rëndësinë e harmonisë brenda grupit, sidomos në një skuadër me pritshmëri të larta si Real Madridi.

“Ne kalojmë më shumë kohë me njëri-tjetrin sesa me familjet tona. Duhet të kemi një marrëdhënie të mirë”, deklaroi ai, duke lënë të kuptohet se bashkëpunimi dhe mirëkuptimi janë thelbësore për suksesin.

Forma e tij në javët e fundit është parë si një sinjal pozitiv edhe për funksionimin e repartit ofensiv, ku partneriteti me Mbappen pritet të jetë vendimtar në fazën më të rëndësishme të sezonit, shkruan Telegrafi.

Në një moment kur e ardhmja e brazilianit vazhdon të diskutohet, mesazhi i tij është i qartë, ai dëshiron të fitojë dhe ta bëjë këtë përkrah më të mirëve, me Mbappen në qendër të projektit.

Interi ka triumfuar 3-2 ndaj Juventusit në kuadër të javës së 25-të të Serie A, duke ruajtur kreun e renditjes me 61 pikë.

Ndeshja nisi me një episod të çuditshëm, kur Andrea Cambiaso shënoi një autogol për Interin në minutën e 17-të, por e shpëtoi situatën më vonë duke realizuar golin e barazimit (26’).

Situata u vështirësua për Juventusin kur Pierre Kalulu u përjashtua me kartonin e dytë të verdhë në minutën e 42-të, duke lënë mysafirët me një lojtar më pak për pjesën më të madhe të ndeshjes.

Pjesa e dytë u luajt me intensitet të lartë dhe dramatik, me golin e Francesco Pio Esposito që riktheu epërsinë për Interin (76’), ndërsa Manuel Locatelli barazoi për Juventusin (83’).

Vendimi i ndeshjes erdhi në minutën e fundit, kur Zielinski, pas një asistimi fantastik nga Bisseck, realizoi golin e fitores (90’), duke siguruar pikët e plota për “Nerazzurët”.

Me këtë fitore, Interi mban lidershipin në Serie A, ndërsa Juventus bie në vendin e pestë me 46 pikë.

Boksieri Labinot Xhoxhaj e ka mbrojtur titullin e kampionit të Evropës (EBU), duke e mposhtur suedezin Pezhman Seifkhan.

Në përballjen që u zhvillua në Lahr të Gjermanisë, Xhoxhaj dominoi nga fillimi dhe arriti t’ia “fikë dritat” për t’iu gëzuar fitores së 22-të në karrierë.

Pas goditjeve të vazhdueshme, në raundin e katërt Xhoxhaj e rrëzoi suedezin, i cili nuk arriti të ngrihej kësisoj mori fitore të madhe.

Për më shumë shikoni momentin:

Ndërkohë, kjo fitore padyshim i ndihmon Xhoxhajt që edhe të garojë për titullin e kampionit të Botës, i cili mbetet objektivi kryesor i karrierës.