rilindja.albeniplast.com

Tag: ekonomi

  • Tahiri: Tërheqja e një pjese të Trustit në këtë kohë është domosdoshmëri

    Tahiri: Tërheqja e një pjese të Trustit në këtë kohë është domosdoshmëri

    Abelard Tahiri, shef i grupit parlamentar të Partisë Demokratike të Kosovës (PDK), ka thënë të martën se është e domosdoshme tërheqja e një pjese të Trustit për shkak të situatës ekonomike në Kosovës.

    Sipas tij, Qeveria e Kosovës “nuk ka ofruar alternativë përballë gjendjes sociale në vend”.

    “Mundësia për të tërhequr një pjesë nga paratë e kursyera në këto rrethana, ka qenë kërkesë e drejtpërdrejtë e qytetarëve, prandaj i ftoj të gjithë deputetët e Kuvendit të Kosovës dhe veçmas ata të mazhorancës, që nesër ta votojnë projektligjin që mundëson një gjë të tillë”, ka shkruar Tahiri në Facebook.

    Po ashtu Tahiri ka theksuar se “kjo nuk është betejë politike por domosdoshmëri konkrete dhe kërkesë e të gjithë qytetarëve pa dallim”.

    Projektligjin për Trustin e ka propozuar Bekim Haxhiu, deputet i PDK-së.

    Qeveria e kundërshton këtë politikë duke e cilësuar me pasoja afatgjate. E si përgjigje ndaj ekzekutivit janë organizuar edhe protesta.

  • Bankat komerciale në Kosovë me shërbimet më të shtrenjta në rajon

    Bankat komerciale në Kosovë me shërbimet më të shtrenjta në rajon


    Sipas të dhënave të Bankës Qendrore të Kosovës, vlera e fitimit neto të bankave deri në muajin prill të këtij viti është mbi 44 milionë euro.

    Mbi 117 milion euro neto i fituan gjatë viti 2021.

    Por, edhe përkundër fitimit të madh, bankat komerciale në Kosovë vazhdimisht po i rrisin çmimet e shërbimeve bankare.

    Madje, këto shërbime janë më të shtrenjta sesa në vendet e rajonit.

    Por, Sipas Bankës Qendrore të Kosovës, çështja e çmimeve të shërbimeve bankare do të adresohet përmes draft ligjit të ri për shërbimet e pagesave e që është në proces të finalizimit.

    “Ju njoftoj se çështja e çmimeve të shërbimeve bankare do të adresohet përmes draft ligjit të ri për shërbimet e pagesave, ku përveç Direktivës për Shërbime të Pagesave dhe Direktivës për Institucionet e Parave Elektronike, ky draft ligj planifikohet të transpozoj edhe Direktivën e BE-së “Për llogarinë e pagesës”.

    Ky institucion nuk ka dashur të tregoj se cilat nga shërbimet bankare kanë pësuar rritje më të mëdha të çmimeve, me arsyetimin se kjo çështje është kompetencë e Shoqatës së Bankave të Kosovë.

  • Shahini: Nëse hiqet akciza një litër naftë mund të shitet 35 cent më lirë

    Shahini: Nëse hiqet akciza një litër naftë mund të shitet 35 cent më lirë

    Kryetari i Aleancës Kosovare të Bizneseve (AKB), Agim Shahini i ka propozuar Qeverisë që deri në fund të verës të suspendojë akcizën për derivatet e naftës.

    Sipas tij, kjo do të ndikonte që një litër të shitet më shumë se 35 cent më lirë.

    Ai thotë se ka kërkuar që mazha për import dhe shitje të derivateve të naftës të jetë së paku 2% për kurse mazha për shitje me pakicë të jetë rreth 10%.

    “Kosova duhet të merr shembuj të mirë të shteteve të ndryshme për tejkalimin e krizës pas shtrenjtimit të energjisë, derivateve dhe të gjitha artikujt ushqimor. AKB-ja i propozon Qeverisë që përkohësisht deri në fund të verës të suspendon akcizën në derivate e cila do të ndihmon më shumë se 35 cent për çdo litër për çdo qytetar pavarësisht a është ai subjekt ekonomik apo subjekt individual”, tha ai.

    “Qeveria nuk mund të kërkojë uljen e fitimit, ata nuk mund të punojnë në humbje dhe në rast se ata detyrohen të punojnë sipas kërkesës së uljes së mazhës në përqindje të ultë, ata do të rrezikojnë që tregu të mbetet pa furnizim të derivateve. Ne si AKB i kërkojmë Qeverisë që mazha për import dhe shitje të derivateve të naftës të jetë së paku 2 për qind kurse mazha për shitje me pakicë të jetë përafërsisht rreth 10 për qind”, theksoi Shahini.

    Tutje ka shtuar që lirimi i përkohshëm nga akciza do të rimburësohet nga rritja e çmimeve nga TVSh-ja dhe Dogana, raporton EO.

    Shahini thotë se është antikushtetues të kërkohet ndërhyrja në përcaktimin e mazhës, por Qeveria mund të marrë masa të tjera sic kanë bërë shumë shtete, duke i liruar qytetarët nga taksat dhe akciza.

    “Kjo do të rimburësohet nga rritja e çmimeve nga TVSh-ja dhe dogana. Sipas analizave tona mbi 25 cent janë më shumë mjete të hyra për litër të planifikuara nga doganat dhe akciza, prandaj në këtë moment shteti dhe buxheti i saj nuk do të humb asgjë, do t’i merr të hyrat e planifikuara, këto të hyra janë të paplanifikuara, rritja e çmimit të derivateve, prandaj Qeveria duhet të reflektojë pozitivisht. Nëse do të hiqet akciza do të ishte e mjaftueshme që përkohësisht të mbulohen nga TVSh dhe dogana humbjet e akcizës. Në rast se kemi buxhet shtesë, edhe TVSh-ja të hiqet kjo do të ndikojë shumë më shumë në rritjen e mirëqenies tek te gjithë qytetarët për arsye se kriza i ka prek të gjithë”, shtoi ai.

    “Qeveria vazhdimisht bizneseve po u kërkon uljen e mazhës, ndërsa vet nuk po reflekton, asgjë nuk po ndërmerr. Është antikushtetues të kërkohet ndërhyrja në përcaktimin e mazhës, është e garantuar me Kushtetutë, por nuk është antikushtetuese që shteti, Qeveria e vendit të lirojë përkohësisht nga akciza qytetarët e vet, siç është Maqedonia, Sllovenia, Kroacia, dhe së fundmi Hungaria, i cili është çmimi më i lirë në Evropë me më së paku 22 cent, pikëshit për shkak se i ka liruar qytetarët e vet nga taksat dhe nga akciza për tejkalimin e krizës”.

  • Abstenoi në Komision, ky është vendimi përfundimtar i Duda Balje për Trustin

    Abstenoi në Komision, ky është vendimi përfundimtar i Duda Balje për Trustin

    Deputetja e Kuvendit, Duda Balje, e cila abstenoi në Komisionin për Buxhet dhe Transfere për propozimin e tërheqjes së mjeteve nga Trusti ka qenë votë në emër të Grupit Parlamentar Multietnik. Por, me 16 qershor tregon se do të votoj pro tërheqjes së parave.

    Deputetja e Grupit Multietnik në Kuvendin e Kosovës, Dude Balje ka vendosur të votojë pro tërheqjes së mjeteve nga Trusti.

    Balje në një deklarim për Demokracia.com ka thënë se më datën 16 qershor vota e saj do të jetë pro.

    “Siç kam thënë edhe më herët në deklarimet e mija edhe tani mund të them se në Kuvendin e Kosovës unë do të votoj për Trustin. Pra, vota ime do të jetë pro Trustit. Në Kuvend unë votoj në emrin tim personal dhe aty unë vendosi se si do të votojë, dhe siç e thash unë jam pro”, ka thënë Balje për Demokracia.com

    E pyetur nëse i gjithë grupi Multietnik janë një zëri, Balje është shprehur se janë ndarë në mendime për këtë çështje.

    “Grupi Multietnik është nda, disa janë pro disa kundër por prapë se prapë secili flet për vete. Vendimet janë ndryshe. Nuk e di se kush do të votoj kundër apo kush pro. Kjo do të vendoset deri në fund. Mirëpo, dihet se gjysma do ta përkrahin e gjysma jo. Personalisht do ta përkrahi dhe dua t’i jap mundësi qytetarëve të Kosovës vet me vendos për vete nëse duan me marrë 30%, po nëse jo nuk është e obligueshme. Nëse ata mendojnë se nuk është mirë me marrë ata nuk kanë obligim me marrë”, ka thënë tutje Balje.

    Projektligji për Fondet Pensional do të shqyrtohet në seancën e radhës të Kuvendit të Kosovës, e cila do mbahet më 16 qershor.

    Kjo është bërë e ditur nga shefat e grupeve parlamentare pas mbledhjes së Kryesisë së Kuvendit e cila u mbajt gjatë ditës së djeshme.

    Caktimin e seancës për shqyrtimin e Projektligjit për Trustin e ka cilësuar si “lajm të mirë” Besnik Tahiri, shef i GP të Aleancës për Ardhmërinë e Kosovës.

    “Në seancën e radhës të kuvendit, më 16 qershor, menjëherë pas pikës së parë, e cila parasheh deklarimet jashtë rendit të ditës, do të shqyrtohet Projektligji për Fondet Pensionale”.

    Në një deklarim për Demokracia, deputeti i Partisë Demokratike të Kosovës, Bekim Haxhiu, ka treguar se është duke biseduar dhe ka biseduar me deputetët lidhur me votimin e projektligjit që mundëson tërheqjen e 30 për qind të Trustit. Por, ai ka thënë se Qeveria dhe kryeministri Albin Kurti u ka bërë presion deputetëve të VV-së dhe pakicave që të mos e votojnë këtë projektligj.

    Krijimi i mundësive ligjore, që qytetarët e Kosovë të tërheqin deri në 30 për qind të kursimeve të tyre nga Fondi i Kursimeve Pensionale – apo siç njihet ndryshe Trusti – ka ditë që ka shkaktuar debat në Kosovë, me argumente për dhe kundër. Në vitin 2020, pas krizës ekonomike që ka shkaktuar pandemia e koronavirusit, Kuvendi i Kosovës ka miratuar Ligjin për rimëkëmbjen ekonomike, që u ka mundësuar qytetarëve tërheqjen e 10 për qind të shumës së siguruar nga kursimet pensionale, gjatë kohës sa kanë punuar.

    Procesi i tërheqjes së kësaj përqindjeje nga Trusti ka nisur nga fundi i dhjetorit të vitit 2020 dhe ka zgjatur deri në fillim të prillit të vitit 2021.

    Sipas të dhënave të Fondit për Kursime Pensionale, asokohe janë tërhequr mbi 198 milionë euro nga 427,371 kontribues.

  • Qytetarët po marrin kredi edhe për mbulimin e shpenzimeve ditore

    Qytetarët po marrin kredi edhe për mbulimin e shpenzimeve ditore

    Mihrije Gashi ka marrë tre mijë euro kredi për ta ndihmuar në mbulimin e shpenzimeve të përditshme.

    Mihrija, në të 50-tat e saj, jeton me bashkëshortin, tre fëmijët dhe vjehrrit në lagjen “Kalabria” në Prishtinë.

    Ajo punon në një dyqan rrobash, ku paguhet 300 euro në muaj – ngjashëm sikurse edhe bashkëshorti i saj, i cili punon si elektricist në një biznes privat.

    Kredinë thotë se e ka marrë në fillim të këtij viti dhe, për dy vjet rresht, do t’i paguajë bankës një këst mujor prej 130 eurosh, me normë interesi rreth 6 për qind.

    Me rritjen e vazhdueshme të çmimeve, Mihrija thotë se ndryshe nuk ka mundur t’ia dalë.

    “Kredinë e kam marrë që të kem para në shtëpi, për nevoja të shtëpisë, për barna… Vjehrrit janë të sëmurë dhe duhet të kem para të gatshme në shtëpi”, thotë Mihrija për Radion Evropa e Lirë.

    “Jemi duke mbijetuar me këto rroga. Edhe pse po mundohemi të kursejmë çdo ditë, po marrim para [edhe] nga kredia”, thotë ajo.

    Sipas Agjencisë së Statistikave të Kosovës, çmimet e produkteve janë rritur për 11.2 për qind në muajin prill, krahasuar me periudhën e njëjtë të vitit të kaluar.

    Lëvizja e çmimeve në Kosovë

    Në Kosovë po vazhdon ngritja e çmimeve të disa produkteve. Agjencia e Statistikave të Kosovës ka publikuar të dhënat nga 28 marsi.

    Rritja ka filluar gradualisht, pas shpërthimit të pandemisë së koronavirusit në vitin 2020, ndërsa hov i ka dhënë edhe lufta e Rusisë në Ukrainë, që ka nisur në fund të shkurtit. Të dyja këto vende janë eksportuese të mëdha të drithërave, andaj lufta mes tyre ka lëkundur tregjet.

    Të dhënat e Bankës Qendrore të Kosovës konfirmojnë se në sektorin bankar ka rritje të kredive familjare.

    Në dhjetor të vitit të kaluar, vlera e përgjithshme e kredive në dhjetë bankat komerciale në Kosovë ka arritur në mbi 3.75 miliardë euro.

    Prej tyre, mbi 1.4 miliard euro kanë qenë kredi për ekonomi familjare, që kanë për qëllim konsumin.

    Sipas të dhënave të BQK-së, shuma e kredive për konsum është rritur për 45 për qind në vitin 2021. Në vitin 2020, vlera e kredive për konsum ka qenë rreth 1.2 miliard euro, ndërsa në vitin 2019 kjo shumë ka qenë 1.1 miliard euro.

    Nga BQK-ja thonë për Radion Evropa e Lirë se kreditë për qëllime konsumi janë rritur për 19 për qind edhe gjatë muajve të parë të këtij viti, por nuk komentojnë se cilat mund të jenë arsyet e këtij trendi.

    Vetëm brenda një muaji, sipas të dhënave të BQK-së, qytetarët e Kosovës kanë marrë kredi në vlerë prej rreth 100 milionë eurosh nga bankat komerciale, derisa kanë depozituar para në vlerë mbi 50 milionë euro.

    Megjithatë, në Anketën e Kreditimit Bankar, të publikuar nga BQK-ja në muajin mars, thuhet se nevoja për financim të konsumit dhe rritja e besueshmërisë së konsumatorëve ndaj bankave janë faktorët kryesorë që kanë ndikuar në rritjen e kredive konsumuese.

    Bektashi: Rënie e standardit jetësor

    Profesori i ekonomisë në Universitetin e Prishtinës, Mejdi Bektashi, thotë se qytetarët marrin borxhe në institucionet financiare, për shkak të rënies së standardit të tyre jetësor.

    Sipas tij, rritja e vlerës së kredive për qëllime të konsumit është “fenomen shqetësues”.

    “Këta njerëz, në të ardhmen, duhet t’i ulin blerjet e tyre, me qëllim që t’i paguajnë këstet mujore të kredive që kanë marrë tash”, thotë Bektashi.

    Mihrija konfirmon se familja e saj ka filluar t’i reduktojë shpenzimet, për shkak të kthimit të këstit të kredisë.

    “Nuk po i blejmë më disa gjëra që nuk janë të domosdoshme… më pak lëngje, më pak ëmbëlsira… As ne dhe as fëmijët nuk dalin shpesh në lokale. Edhe daljet gjatë vikendeve i kemi eliminuar”, thotë Mihrija.

    Edon Thaçi, punonjës në sektorin privat në Kosovë, rrëfen situatë të ngjashme. Ai thotë se, tash e dy vjet, paguan një kredi që ka marrë për renovimin e shtëpisë.

    “Kthimi i kredisë është bërë problem. Çmimet janë rritur, vlera e kredisë dhe paga kanë mbetur të njëjta”, thotë Edoni.

    Paga mesatare bruto në Kosovë llogaritet të jetë rreth 460 euro.

    Në sektorin privat, paga mesatare është rreth 380 euro, ndërsa në sektorin publik rreth 620 euro.

    Rritje çmimesh, ndërkaq, kanë pësuar gati të gjitha produktet: nga buka deri te rryma.

    Sindikalistë të sektorëve të ndryshëm në Kosovë kanë kërkuar disa herë rritje pagash.

    Qeveria e Kosovës, në muajin prill, ka miratuar projektligjin për rritjen e pagës minimale nga 130-170 euro, sa është aktualisht, në 250 euro neto.

    Ka qenë e paraparë që ky projektligj të dalë në votim në Kuvendin e Kosovës më 6 qershor, por kjo nuk ka ndodhur për shkak të mungesës së kuorumit.

    Në prill, Qeveria e Kosovës ka ndarë 100 milionë euro për kategori të ndryshme të shoqërisë, për t’i ndihmuar, siç është thënë, të përballojnë situatën e krijuar nga çmimet në rritje.

    Megjithatë, ekspertë të ekonomisë e kanë interpretuar këtë si ndihmë afatshkurtër dhe jo si zgjidhje të përhershme.

    Profesori Bektashi thotë se qytetarët duhet të kenë kujdes me shpenzimet, por edhe me kreditë, pasi, sipas tij, në vjeshtë mund të pritet valë tjetër e rritjes së çmimeve.

    “Gjatë muajve të verës, krizën mund ta zbusin remitencat dhe ardhja e diasporës, por, në muajt shtator dhe tetor mund të paraqitet një krizë më e thellë, për shkak të zvogëlimit të sasisë së parasë së gatshme në qarkullim”, thotë ai.

    Remitencat, apo dërgesat e parave nga diaspora, përbëjnë një burim të madh të të ardhurave në Kosovë.

    Numri i qytetarëve të Kosovës që jetojnë jashtë vendit, sipas të dhënave të ASK-së, deri në fund të vitit 2018, vlerësohet të jetë më shumë se 850 mijë banorë.

    Vetëm vitin e kaluar, sipas të dhënave të Bankës Qendrore të Kosovës, remitencat kanë kapur vlerën e rreth 1.2 miliard eurove – shumë kjo rekorde për Kosovën.

    Banka Botërore ka paralajmëruar, po ashtu, vazhdim të rritjes së çmimeve, nëse lufta në Ukrainë vazhdon edhe për kohë të gjatë./Radion Evropa e Lirë/

  • Projektligji për Trustin procedohet në seancën e radhës të Kuvendit

    Projektligji për Trustin procedohet në seancën e radhës të Kuvendit

    Projektligji për Fondet Pensional do të shqyrtohet në seancën e radhës të Kuvendit të Kosovës, e cila do mbahet në seancën e radhës, më 16 qershor.

    Seanca e radhës e kuvendit do të mbahet të mërkurën e javës së ardhshme, kanë bërë të ditur shefat e grupeve parlamentare pas mbledhjes së Kryesisë së Kuvendit të hënën.

    “Sot u mbajt mbledhja e rregullt dhe është caktuar që seanca e re do të mbahet të enjten, javën e ardhshme, më 16 qershor”, tha Mimoza Kusari-Lila, shefe e GP të Lëvizjes Vetëvendosje.

    Ndërkaq, caktimin e seancës për shqyrtimin e Projektligjit për Trustin e ka cilësuar si “lajm të mirë” Besnik Tahiri, shef i GP të AAK-së.

    “Në seancën e radhës të kuvendit, më 16 qershor, menjëherë pas pikës së parë, e cila parasheh deklarimet jashtë rendit të ditës, do të shqyrtohet Projektligji për Fondet Pensionale”, tha ai.

  • FMN-ja e Banka Botërore nuk duhet të përzihen tek çështja e Trustit, sipas ekonomistëve

    FMN-ja e Banka Botërore nuk duhet të përzihen tek çështja e Trustit, sipas ekonomistëve

    Paratë e Trustit nuk duhet të preken assesi.

    Pos qeverisë dhe shumicën në parlament, kështu po thonë edhe në Fondit Monetar Ndërkombëtar dhe Bankën Botërore. Njëri dhe tjetri institucion financiar global po pretendojnë se kjo rrezikon qëndrueshmërinë e sistemit pensional në Kosovë.

    Por ekonomisti kosovar Florin Aliu thotë se këto mekanizma nuk e kanë për mision të tregojnë se çfarë mund e duhet të bëjnë qytetarët me kursimet e veta.

    “FMN-së i intereson stabiliteti i përgjithshëm buxhetor dhe financiar në Kosovë, stabiliteti financiar është i siguruar me faktin se bankat kanë fitime enorme në Kosovë”, shprehet Aliu.

    I njëjti ka mesazh edhe për qeverinë, lidhur me këto apele.

    “Këta në pushtet mos të bëhen që e kanë aq shumë gajle për FMN-në, sepse i dimë qëndrimet që i kanë pasë për rekomandimet e institucioneve ndërkombëtare, sidomos ato të FMN-së për privatizimet e këto”, shton Aliu.

    Ekonomisti tjetër, Erton Bega, që është kundër tërheqjes nga Trusti, thotë se dy institucionet e huaja parapëlqejnë të deklarohen kur është puna te lëvizjet e mundshme domethënëse financiare.

    “Zakonisht japin rekomandime konservative që nuk e rrezikojnë stabilitetin makrofinanciar të vendit”, tregon ai.

    Këso rekomandime konservative, Fondi Monetar ka dhënë disa herë për Kosovën, gjatë vendimeve të mëdha ekonomike. Por, qeveritë e mëhershme nuk është se i morën.

  • Drejtori i ATK-së tregon se sa është tatimi për përfituesit nga rrjetet sociale në Kosovë

    Drejtori i ATK-së tregon se sa është tatimi për përfituesit nga rrjetet sociale në Kosovë


    Përfituesit nga rrjete sociale si TikTok, Instagram, YouTube, Facebook, e të tjera, tash e tutje do të tatohen nga shteti.

    Në fakt, Drejtori i Administratës Tatimore të Kosovës, Ilir Murtezaj, në Sytë 7 në Klan Kosova, tha se ligji për t’u tatuar fitimet nga rrjetet sociale ka ekzistuar kaherë, pasi që të njëjtat trajtohen njëjtë si bizneset tjera. Por tani, kanë bërë programet softuerike, që ua mundëson t’i detektojnë përfituesit.

    I njëjti ka treguar edhe për shumën që do ta paguajnë përfituesit nga rrjetet sociale.

    Sipas tij, “te bizneset e vogla ose të individët që realizojnë të ardhura brenda tre muajve deri në 1250 euro, është një normë 37.5 euro, që duhet për të paguar tatim si dhe kontributin pensional. Mbi atë shumë, duhet të paguajnë pjesën e 9 për qind në pjesën e të hyrës së saj. Por, nëse kanë qarkullim mbi 30 mijë euro brenda viti, janë të detyruar të paguajnë edhe TVSH, gjë që norma e TVSH është 18%”.

    ATK, po ashtu do të mbledh tatimin edhe nga veprimtaritë ndërtimore, siç është ndërtimi i lartë dhe i ulët, grupet punuese dhe personat fizikë në kuadër të veprimtarisë së ndërtimtarisë, si: muratorët, armaturë punuesit, betonime, gërmimet e dheut, punuesit e kulmeve, prodhimi dhe montimi i dyerve dhe dritareve, elektricistët, instaluesit e ujit dhe ngrohjes qendrore, montuesit e parketit/laminatit, montuesit e qeramikës, suvatuesit – fasada, prodhimi dhe montimi i ulluqeve, rrethojave të ballkoneve, shkallëve dhe rrethojave të oborreve nga metalet e ndryshme dhe druri, etj.

  • Raiffeisen e NLB marrin vendim për zhvatjen e qytetareve, shtrenjtojnë çmimet

    Raiffeisen e NLB marrin vendim për zhvatjen e qytetareve, shtrenjtojnë çmimet

    Bankat në Kosovë aplikojnë tarifa për klientët edhe për tërheqjen e parave. Çmimi varion nga ajo nëse tërheqja bëhet në sportelet e bankave, që janë dukshëm tarifa më të larta, në bankomatët brenda degëve apo në bankomatët që janë në pika të ndryshme të qyteteve.

    Buletini Ekonomik ka hulumtuar çmimoret e gjashtë bankave më të mëdha që operojnë në Kosovë. Në përditësimin më të ri të çmimoreve të këtyre bankave, shihet se dy banka në Kosovë kanë shtrenjtuar çmimin e shërbimit të tërheqjes së parave nga bankomatët (ATM).

    Këto dy banka janë Raiffeisen Bank dhe NLB banka, përcjell Buletini Ekonomik.

    Nga një çmim prej 20 centësh sa ka qenë tarifa për tërheqje të të hollave deri në 1 mijë euro në bankomatët brenda degës së bankës vitin e kaluar, Banka Raiffeisen tani aplikon një tarifë prej 50 centëve për të njëjtin shërbim.

    Po e njëjta tarifë, tani e tutje aplikohet edhe për tërheqjet e të hollave nga bankomatët jashtë lokacioneve të bankës në fjalë, që vitin e kaluar ishte vetëm 30 centë. Ndërkohë, për tërheqjen e mjeteve për shumat mbi 1 mijë euro, tarifa shkon në 1 euro për transaksion në këtë bankë.

    Për rastet e tërheqjeve të mjeteve në sportelet e kësaj banke, klientët e Raiffeisen duhet të paguajnë 2 euro e 50 centë për shumat deri në 100 mijë euro. Kurse për deponimin e mjeteve nëpër ATM-të e bankës Raiffeisen, aplikohet tarifë prej 50 centëve deri në shumën e 1 mijë eurove, dhe 1 euro mbi shumat prej 1 mijë eurove.

    Banka tjetër, e cila ka shtrenjtuar shërbimin për tërheqje të parave nga bankomatët e saj është NLB-ja.

    Vitin e kaluar, ky shërbim në këtë bankë për tërheqjet nëpër ATM-të brenda degës, ishte 10 cent, kurse jashtë degës – 15 cent, për kartelat debitore. Ndërsa tani, NLB-ja ka shtrenjtuar vetëm shërbimin për tërheqjet e mjeteve nga bankomatët jashtë lokacioneve të bankës. Kështu, nga çmimi prej 15 centësh vitin e kaluar, tani tërheqja e parave në bankomatët jashtë degës së bankës NLB, i detyrohet një tarife prej 30 centëve.

    Kurse, për tërheqjen e parave në ATM të NLB grupit, klientët duhet të paguajnë tarifën prej 1 eurosh.

    E tërheqja në ATM-të e bankave tjera (brenda dhe jashtë shtetit) është 3 euro për klientët e kësaj banke.

    Ndërkohë, për çdo tërheqje nga 5 euro deri në 1 mijë euro në sportelet e kësaj banke, çdo person fizik duhet të paguajë tarifën prej dy eurove. Përjashtim këtu bëjnë pensionistët, studentët, llogaritë për jetimë dhe ata me asistencë sociale, që këtë shërbim e marrin pa provizion.

    Tutje, Banka Kombëtare Tregtare (BKT) në Kosovë, shërbimin për tërheqje të mjeteve nga bankomatët e saj, si brenda degës ashtu edhe jashtë lokacioneve të bankës, e ka pa pagesë. Por, për tërheqjet e të hollave nga bankomatët e bankave të tjera dhe atyre jashtë Kosovës, klientëve të kësaj banke iu duhet të paguajnë tani nga 3 euro minimumi, nga dy euro sa ka qenë vitin e kaluar kjo tarifë. Limiti ditor për tërheqje të mjeteve nga bankomatët e kësaj banke, është 1 mijë euro.

    Edhe banka TEB këtë shërbim e ka falas, ndërsa për tërheqjen e mjeteve në sportele të bankës kalkulon një tarifë prej 1 euro deri në 2 për shumat deri në 10 mijë euro. E për tërheqjen e parave të gatshme në bankomatët e bankave të tjera brenda Kosovës dhe jashtë saj, TEB-i merr 2.0% të vlerës së mjeteve apo minimumi 2 euro për transaksion.

    Limiti maksimal ditor për tërheqje të parave të gatshme në ATM-të e TEB bankës në Kosovë me Debit Kartelë, është 2 mijë euro. Kurse, deponimi i parave në ATM-të e kësaj banke, është pa pagesë.

    Tek banka Procredit, tërheqja dhe deponimi i parave në bankomatet e saj me kartelë debiti, hyn në pakon bazike prej 5 eurove në muaj, ku përfshihen shërbimet për komisionin mujor.

    Kurse, tërheqja në bankomate të bankave tjera në Kosovë dhe jashtë Kosovës (pas tërheqjes së pestë brenda muajit), është 2.25% të shumës ose minimumi 3 euro.

    Gjithashtu edhe Banka Ekonomike e ka pa pagesë shërbimin për tërheqjen e parave në bankomatët që janë në objektet e bankës, derisa për tërheqjet në bankomatët jashtë objekteve të saj, aplikon tarifë prej 15 centëve. Ndërsa, për tërheqjen e parave në bankomatët e bankave tjera në Kosovë dhe jashtë Kosovës, merret 2% e shumës apo minimumi 3 euro.

    Limiti ditor i transaksioneve në bankomatët e Bankës Ekonomike, është 500 euro.

  • Deputeti që propozoi tërheqjen e Trustit, i bën një thirrje Kurtit

    Deputeti që propozoi tërheqjen e Trustit, i bën një thirrje Kurtit

    Ndihmat nga 100 euro të qeverisë, deputeti i PDK-së insiston për Trustin.

    Deputeti Bekim Haxhiu, i cili propozoi ndryshim-plotësimin e Ligjit për Fondet Pensionale, i ka bërë thirrje qeverisë që ta shqyrtojë propozimin e tij për Trustin pavarësisht prej premtimit të qeverisë për ndarjen e nga 100 eurove për tri kategori.

    Haxhiu tha se nuk do të heqë dorë nga iniciativa që i hapë rrugë tërheqjes së 30 për qind të mjeteve nga Trusti Pensional, e cila sipas tij, është kërkesë e qytetarëve të Kosovës.

    “Qytetarët po kërkojnë që të kenë mundësi që t’i tërheqin mjetet nga Trusti, është kërkesë e qytetarëve. Kjo çka dëgjova dhe pash është nga një asistencë sociale më shumë dhe kriza ekonomike nuk mund të tejkalohet për çdo familje përmes lëmoshës por përmes mbështetjes substanciale në përmirësim të mirëqenies së tyre ne kemi propozuar edhe si PDK edhe masa konkrete për zbutjen e krizës”, tha ai për Front Online.

    Ai tha se Qeveria “Kurti” me vendime të tilla po mundohet t’iu hedhë hi syve qytetarëve para krizës që e ka kapluar vendin.

    Kanë mbetur edhe nëntë ditë që Qeveria e Kosovës, të deklarohet se a është pro apo kundër plotësim – ndryshimit të ligjit, i cili i hap rrugë lejimit të tërheqjes së 10 deri në 30% të kursimeve pensionale të qytetarëve të Kosovës.

    Kryeministri i Kosovës, Albin Kurti, njoftoi të martën se për muajin prill, pensionistëve, punëtorëve dhe studentëve do t’iu ndahen nga 100 euro.

    Sipas tij, vlera totale për këtë ndihmë do të jetë rreth 100 milionë euro.

    “Për muajin prill do të dyfishojmë vlerën e asistencës sociale për të gjitha familjet që përfshihen në asistencë sociale. Pensionistëve do t’ua ndajmë edhe nga 100 euro shtesë për muajin prill, për të gjitha shtresat. 100 euro do t’i ndajmë për punëtorët e sektorit privat, do të ndajmë shumën prej 100 eurove edhe për mbi 80 mijë zyrtarë publikë. Po ashtu, të gjithë studentët do të përfitojnë nga 100 euro. Për shtresat e cenueshme do të shpërndajmë mbi 80 mijë euro”, tha Kurti në konferencën e mbajtur së bashku me ministrin e Financave, Hekuran Murati.